Hoxe levouse a cabo un simulacro na parroquia de Celas, para comprobar as capacidades do dispositivo en lumes que afectan de xeito importante ao monte ademais de poder poñer en risco ás persoas e bens
En concreto, realizáronse adestramentos específicos sobre comunicacións Tetra, manobras de autoprotección ou coordinación de medios
A Xunta realizou esta mañá un simulacro no concello de Culleredo para reforzar a preparación do Servizo de prevención e defensa contra os incendios forestais (SPIF) de Galicia ante lumes nos que se activa a situación operativa 1, pola afectación a masas forestais e pola posibilidade de que estean en risco tanto as persoas como os seus bens. Deste xeito, comprobáronse as capacidades xerais do dispositivo neste tipo de situacións.
Así, o distrito forestal II Bergantiños-Mariñas coruñesas puxo a proba a capacitación dos efectivos mediante adestramentos específicos sobre comunicacións Tetra, manobras de autoprotección, coordinación de medios, etc. Tamén se ensaiou a activación da chamada de emerxencia por parte dos profesionais cando se atopan en situacións de perigo.
Este simulacro desenvolveuse no monte Xalo, na parroquia de Celas, onde participaron 2 técnicos, 3 axentes, 3 brigadas e 3 motobombas. Ademais, tamén se despregou persoal de protección civil de Culleredo e A Laracha para dar apoio loxístico nas tarefas de extinción.
En definitiva, este tipo de prácticas permiten non só reforzar os coñecementos dos integrantes do Servizo de prevención e defensa contra os incendios forestais de Galicia senón tamén testar a operatividade das tecnoloxías e así familiarizar aos profesionais co seu emprego.