A Xunta incorporará 81 novos centros a E-DIXGAL o vindeiro curso e amplía este Programa de libro dixital a 3º e 4º de ESO noutros 139

A mellora na convocatoria enmárcase na Estratexia Galega de Educación Dixital 2030 e no Plan EDU100, co obxecto de impulsar a dixitalización do ensino

A Xunta de Galicia incorporará o vindeiro curso 2021/2022 ao programa de libro dixital E-Dixgal un total de 81 novos centros e ampliará a participación doutros 139 aos cursos de 3º e 4º de ESO, a principal novidade da convocatoria deste ano. Ademais, dous centros educativos que xa o desenvolven en Secundaria incorporan a iniciativa tamén á etapa de Primaria. Deste xeito, o número total de centros integrados no E-Dixgal elévase a 551, dos que 197 son da provincia da Coruña, 90 da de Lugo, 46 da de Ourense e 218 da de Pontevedra.

Das novas incorporacións, 29 son centros da provincia da Coruña e 14 son da provincia de Lugo. No caso da provincia de Ourense súmanse á iniciativa un total de sete centros, mentres que na provincia de Pontevedra os centros novos serán 31. Así mesmo, o CPI de Xanceda (Mesía) e CPR Plurilingüe Padres Somascos, (A Guarda) que xa desenvolven o E-Dixgal en Secundaria, ampliarano o vindeiro curso tamén a Primaria.

Os centros de nova incorporación en Primaria comezarán a traballar co libro dixital o vindeiro curso en 5º, e estenderano o seguinte a 6º. No caso dos que se sumen ao proxecto na etapa de Secundaria, comezarán en 1º de ESO e terán o compromiso de ir estendéndoo progresivamente ata completar os catro cursos.

Duplícase a cifra en secundaria

A convocatoria deste ano incluía por primeira vez a posibilidade de ampliar o programa aos cursos de 3º e 4º de ESO (ata o momento está implantado en 5 e 6 de Primaria e en 1º e 2º de ESO). Serán en total 139 os colexios e institutos que se acollan a esta ampliación, o que suporá case duplicar o número de alumnos de ESO con E-Dixgal en Galicia. Deles, 46 son centros da provincia da Coruña, 28 da provincia de Lugo, cinco da provincia de Ourense e 60 da provincia de Pontevedra.

Esta mellora supón, ademais, que por primeira vez un alumno galego poderá estudar con libro dixital gratuíto durante seis cursos consecutivos.

Estratexia Galega de Educación Dixital 2030

A ampliación do proxecto E-Dixgal é unha das liñas de acción da Estratexia Galega de Educación Dixital 2030, a folla de ruta coa que o Goberno galego vai impulsar a dixitalización do sistema educativo, e que inclúe medidas como a dotación de espazos maker e polos creativos nos centros, ou a implantación da Intelixencia Artificial no curriculum de todas as etapas educativas.

Así mesmo, enmárcase no Plan EDU100 (Plan de Infraestruturas Dixitais Educativas 2021-2023), coordinado pola Amtega, que supón un investimento 134,6M€ nos próximos tres anos. Ao seu abeiro o Consello da Xunta autorizou xa a adquisición de 45.000 ultraportátiles e equipos para 2.000 aulas, así como a compra de 55.000 equipos fixos e portátiles destinados a docentes. Tamén se deu luz verde á adquisición de 5.000 paneis interactivos para aulas de centros educativos, que cumprirán co obxectivo de que o 100% das aulas de centros públicos dependentes da Consellería de Cultura, Educación e Universidade entre 1º de Primaria e 2º de Bacharelato sexan dixitais; capacidade de conexión de ata 1Gbps e wifi en todos os espazos docentes.

https://www.xunta.gal/notas-de-prensa/-/nova/57985/xunta-incorporara-81-novos-centros-dixgal-vindeiro-curso-amplia-este-programa

A directora xeral de Relacións Laborais, Elena Mancha, inaugurou hoxe en Santiago de Compostela un webinario dirixido a 500 persoas, que se repetirá o próximo día 18 debido a que se superou o número máximo de prazas

O obxectivo é que as empresas leven a cabo unha correcta elaboración deste rexistro, xa obrigatorio para as compañías, para poder coñecer as posibles desigualdades salariais entre mulleres e homes

Mancha destacou que a finalidade principal é que as empresas tomen conciencia e adopten medidas que eliminen a fenda salarial

A directora xeral de Relacións Laborais, Elena Mancha, inaugurou hoxe un webinario co que a Xunta ofrece formación práctica ao tecido empresarial galego sobre como facer un rexistro retributivo. Na iniciativa participaron un total de 500 persoas, o número máximo de prazas, polo que a experiencia práctica repetirase o próximo martes 18 de maio.

Mancha expuxo que a Consellería de Emprego e Igualdade pretende co webinario, a través da elaboración dun rexistro retributivo, clarificar as obrigas das empresas referentes ao rexistro salarial, que afecta a todo o tecido produtivo sen distinción no número de traballadores.

É preciso lembrar que o Real Decreto 902/2020, que desenvolveu o RDL 6/2019, require ás empresas a elaboración dun rexistro retributivo con inclusión dos valores medios dos salarios, complementos salariais e percepcións extra salariais desagregados por sexos, e a obtención das medias aritméticas e as medianas.

Así, Mancha apuntou que o que se busca é a elaboración correcta deste rexistro para que se poidan extraer datos que permitan dar a coñecer as posibles desigualdades salariais entre mulleres e homes. “O obxectivo principal é que as empresas tomen conciencia e adopten medidas que eliminen de xeito progresivo a fenda salarial”, matizou.

O webinario, ademais, contou coas relatoras Mónica González Otero, inspectora de Traballo e Seguridade Social destinada en Vigo; e María de los Ángeles García, graduada social, avogada e auditora sociolaboral, experta en políticas de igualdade, prevención de riscos laborais e responsabilidade social corporativa; e presidenta da Asociación Profesional de Especialistas en Xénero, Igualdade, Acoso e Violencia de Xénero (Apregen).

https://www.xunta.gal/notas-de-prensa/-/nova/57956/xunta-ofrece-formacion-practica-tecido-empresarial-galego-sobre-como-facer-rexistro

A conselleira de Emprego e Igualdade, María Jesús Lorenzana, presentou hoxe na Mesa do Emprego Autónomo o programa Autónomos Dixitais que busca mellorar o grao de dixitalización dos traballadores por conta propia e brindarlles unha oportunidade para emprender ou reemprender o seu negocio

Impartiranse dous tipos de cursos, un básico e outro de especialización, dirixidos a catro perfís: menores de 30 anos, mulleres, persoas entre 31 e 44 anos e autónomos que tiveron que pechar a súa actividade pola pandemia e maiores de 45

Trátase dunha iniciativa que se enmarca nas medidas específicas que está a adoptar a Xunta de Galicia para facer fronte á covid-19, xa que o e-commerce adquiriu importancia ao longo da pandemia, nacendo novos hábitos na compra de produtos

As persoas interesadas poden solicitar a súa praza desde mañá a través da páxina web www.autonomosdixitais.com ou do mail info@autonomosdixitais.com

A Xunta porá en marcha este mes de maio a segunda edición do programa Autónomos Dixitais enfocado para que as persoas traballadoras autónomas melloren as súas competencias en comercio electrónico e saiban como aproveitar mellor as novas canles online de comunicación que existen para ofrecer aos seus clientes os seus produtos e servizos.

A iniciativa non só está dirixida aos autónomos dados de alta, senón tamén a aqueles que tiveron que pechar os seus negocios como consecuencia da pandemia co obxectivo de que teñan acceso a unha segunda oportunidade a través da dixitalización. A formación, ademais de gratuíta, é flexible e adaptable aos horarios de preferencia, impártese a través dunha aula dixital e conta con titorización persoal.

A conselleira de Emprego e Igualdade, María Jesús Lorenzana, presentou hoxe na Mesa do Emprego Autónomo de Galicia a iniciativa coa que se prevé formar a 1.200 traballadores por conta propia en e-commerce xa que, segundo explicou, o comercio electrónico adquiriu unha gran importancia ao longo da pandemia, nacendo novos hábitos na compra de produtos. De feito, expuxo que, de acordo co VII estudo sobre e-commerce en España, realizado polo por IAB -a maior asociación mundial de comunicación, publicidade e marketing dixital presente en 47 países- o comercio por Internet segue crecendo, e en España un 72% dos cibernautas de entre 16 a 70 anos utilizan a rede como canle de compra.

En palabras da conselleira, a Xunta ten que seguir apostando polo comercio tradicional, incentivando nas tendas as compras e axudando ao mantemento dos seus postos de traballo e, ao mesmo tempo, debe seguir impulsando a formación en dixitalización para apoiar aos autónomos ante os novos retos.

Neste contexto, naceu o programa Autónomos Dixitais que este ano diríxese a catro perfís: a mocidade (menores de 30 anos); mulleres; persoas entre 31 e 44 anos e autónomos que tiveron que pechar o seu negocio como consecuencia da covid-19; e maiores de 45 anos. Para cada un deses catro perfís impartiranse dous cursos en formato dixital e gratuítos: un básico sobre fundamentos para a creación dun proxecto de comercio electrónico; e un avanzado, de especialista en e-commerce. Cada curso consta de 50 horas de formación e ao remate os alumnos e alumnas recibirán un diploma de aproveitamento avalado pola Xunta.

O primeiro dos cursos, Fundamentos para a creación dun proxecto de comercio electrónico, centrarase en coñecer os conceptos básicos e aspectos xurídicos do e-commerce, adquirir nocións básicas sobre márketing dixital, promoción e ferramentas 2.0 en Internet e identificar canles de comercialización e distribución.

Na acción formativa avanzada, de Especialista en e-commerce, dirixida a persoas con experiencia profesional na materia ou formación previa, coñeceranse as opcións de financiamento de proxectos de comercio electrónico, como elaborar un plan de márketing online, afondarase en aspectos como a protección de datos, seguridade ou medios de pagamento dispoñibles, crearse e xestionarase unha tenda online con Prestashop e darase formación en xestión de datos, provedores e loxística de envío.

Os interesados en participar nos cursos, que se comezarán a impartir a partir do próximo 20 de maio, poden solicitar desde mañá a súa praza a través da páxina web www.autonomosdixitais.com ou do mail info@autonomosdixitais.com.

Os obxectivos principais do programa, en palabras da conselleira, son mellorar o grao de dixitalización das persoas traballadoras autónomas de Galicia e brindarlles a oportunidade de reposicionar o seu negocio “reemprendelo e/ou emprendelo”. Do que se trata é de reforzar o tecido empresarial galego e, por iso, esta iniciativa enmárcase nas medidas específicas que está a adoptar a Xunta para facer fronte á covid-19.

https://www.xunta.gal/notas-de-prensa/-/nova/57915/xunta-ofrecera-formacion-online-gratuita-comercio-electronico-1-200-autonomos

Feijóo destaca a importancia de manter un elevado estándar de calidade na produción agroalimentaria galega

A nova lei reforzará o control para loitar contra as prácticas desleais, e revisará o catálogo de infraccións e o procedemento sancionador

Prevese que estea aprobada en 2022

Santiago de Compostela, 7 de maio de 2021.- O presidente do Goberno galego, Alberto Núñez Feijóo, avanzou hoxe a aposta da Comunidade pola competitividade dos seus produtos, cunha nova Lei de calidade alimentaria que impulsará as denominación de orixe e as indicacións xeográficas protexidas, así como outras figuras como o selo de artesanía alimentaria.

Baixo o obxectivo de que o novo texto estea aprobado o vindeiro ano, Feijóo subliñou que con esta iniciativa reforzarase tamén o control para loitar contra as prácticas desleais, tanto na produción como na comercialización; ademais da actualización do catálogo de infraccións e do procedemento sancionador, adecuándoo á realidade actual e tendo en conta o cada vez maior volume de vendas que se realizan a través de internet.

Así mesmo, a normativa facilitará a adaptación ao Pacto Verde Europeo e os Obxectivos de desenvolvemento sustentable, que promove a orientación do sistema alimentario cara á sustentabilidade, a innovación e a transición xusta.

Por outra banda, a nova Lei perseguirá un maior control sobre as entidades privadas de certificación alimentaria, que deberán realizar unha declaración responsable cando exerzan actividades relacionadas coa verificación do cumprimento de esquemas de certificación públicos (como a produción integrada, o etiquetado facultativo de carne de aves, as especialidades tradicionais garantidas, etc.); e introducirá criterios para que nas compras públicas se aposte por produtos frescos, de tempada, ecolóxicos, de proximidade e de calidade diferenciada.

“En definitiva, estamos a falar dunha lei para unha nova realidade alimentaria, que poña en valor toda a cadea da agroindustria galega, para priorizar os produtos frescos e de proximidade de Galicia” dixo, incidindo no obxectivo de achegar aos consumidores todas as garantías de que o produto que se ofrece pasou rigorosos controis de calidade e estivo sometido a un especial coidado no proceso de produción e comercialización.

O novo texto lexislativo actualizará a Lei de promoción e defensa da calidade alimentaria galega de 2005, dando resposta aos cambios experimentados na produción e comercialización alimentaria, á incorporación das novas tecnoloxías e de diferentes formas de comercialización.

https://www.xunta.gal/notas-de-prensa/-/nova/57854/galicia-aposta-pola-competitividade-dos-seus-produtos-cunha-nova-lei-calidade

A recuperación de servizos é acorde coa evolución sanitaria e atende ás necesidades de mobilidade, restablecendo as expedicións no 100% das liñas, que foron obxecto de adaptacións como consecuencia da covid-19

A reactivación dos servizos leva aparellado o mantemento das medidas e protocolos establecidos para garantir a seguridade do persoal e viaxeiros

O uso de máscara é obrigatorio e recoméndase efectuar o pagamento coa tarxeta de Transporte Metropolitano de Galicia ou medios similares para evitar contactos

Póñense á disposición dos usuarios dispensadores de xel hidroalcohólico en todos os vehículos e embarcacións, sendo obrigatorio o seu uso antes e despois de realizar o pagamento en metálico

A Xunta restablece desde o vindeiro luns, día 10 de maio, a totalidade dos servizos de transporte público de viaxeiros de titularidade autonómica na Comunidade en condicións de seguridade para usuarios e traballadores.

Trátase de impulsar a normalidade plena na prestación nos servizos de transporte público de titularidade da Xunta. A recuperación de servizos coincide coa conclusión, o 9 de maio, da prórroga do estado de alarma e cun proceso de mellora das condicións sanitarias derivadas da covid-19.

Deste xeito, a Consellería de Infraestruturas e Mobilidade da Xunta publica hoxe no Diario Oficial de Galicia (DOG) a resolución da Dirección Xeral de Mobilidade pola que os concesionarios de transporte regular de viaxeiros de uso xeral poderán prestar todos os tráficos dos contratos para atender as novas necesidades de mobilidade. No seguinte enlace ao DOG pode consultarse a información: https://xurl.es/qas5w

Transporte público seguro

Na reactivación do transporte público de competencia autonómica, a Xunta mantén as medidas para garantir, en todo momento, a seguridade de traballadores e viaxeiros e facilitar a atención ás necesidades de mobilidade, de acordo á evolución da situación sanitaria.

Estas medidas son de aplicación nos servizos de transporte público terrestre de titularidade da Xunta que se desenvolven integramente no territorio galego e nos de transporte marítimo que se levan a cabo entre portos ou puntos da Comunidade Autónoma.

Así, a Xunta ten fixadas as medidas comúns de protección da saúde e hixiénico-sanitarias que deben adoptar as persoas viaxeiras e o persoal de condución ou acompañante, pero tamén especificacións para a limpeza dos vehículos e embarcacións e para as infraestruturas de transporte (estacións de autobuses e paradas), así como a disposición de elementos de sinalización recordatorios das prohibicións, obrigas e recomendacións en materia de hixiene.

Para acceder ao transporte público e mentres permanezan no seu interior, os viaxeiros teñen a obriga de usar máscara e seguir as recomendacións establecidas, como evitar comer.

Deben manter -na medida do posible- as distancias de seguridade durante o acceso e saída dos vehículos ou embarcacións e, se presentan síntomas ou consideran que teñen probabilidade de infección, deberán absterse de empregar os ditos servizos.

Ademais, recoméndase realizar o pago mediante a Tarxeta de Transporte Metropolitano, a tarxeta Xente Nova ou por medios tecnolóxicos similares para evitar contactos. En calquera caso, instalaranse dispensadores de xeles hidroalcohólicos en todos os vehículos e embarcacións, sendo obrigatorio o seu uso antes e despois de realizar o pagamento cando se realice en metálico.

En canto ao persoal de condución ou acompañante, están na obriga de usar máscara ademais de dispor dos equipos de protección determinados polos servizos de prevención de riscos laborais e respectar as medidas en materia de hixiene, saúde pública e seguridade no traballo. Ademais, deben informar e orientar de xeito adecuado aos viaxeiros.

En canto ás condicións de capacidade dos vehículos e embarcacións que realicen servizos colectivos de transporte de viaxeiros de competencia da Comunidade Autónoma de Galicia, isto é o transporte en autobús -de carácter interurbano, urbano, ou de uso especial- e o transporte marítimo, seguen vixentes as limitacións preventivas establecidas pola Consellería de Sanidade.

Así, nos vehículos e embarcacións que dispoñan de asentos, poderase ocupar a totalidade dos mesmos. En calquera caso, deberase manter a máxima separación entre as persoas usuarias cando o nivel de ocupación o permita.

No caso dos vehículos e embarcacións que teñan autorizadas prazas de pé, procurarase que as persoas manteñan entre si a máxima distancia posible, establecéndose como límite de ocupación máxima a dunha sexta parte das prazas de pé.

https://www.xunta.gal/notas-de-prensa/-/nova/57827/xunta-restablece-desde-luns-totalidade-dos-servizos-transporte-publico-titularidade

Incide na importancia da arquitectura como elemento dinamizador da economía, do turismo e da demografía, “un sector que ten moito que dicir na reconstrución económica que afrontamos”

Resalta a convocatoria este ano de axudas a particulares, comunidades e concellos e a posta en marcha de actuacións directas de rehabilitación por case 45 M€

Recorda que o Executivo autonómico leva anos desenvolvendo iniciativas en todas as frontes -vivenda, urbanismo e paisaxe-, activando medidas de país

Afirma que todos estes obxectivos atopan o mellor reflexo nos proxectos galardoados

O presidente do Goberno galego, Alberto Núñez Feijóo, eloxiou hoxe o compromiso da arquitectura de Galicia coa recuperación urbana, paisaxística e coa sustentabilidade para deseñar as vilas e cidades do mañá.

Durante o acto de entrega dos Premios de Arquitectura e Rehabilitación de Galicia 2020, Feijóo destacou a implicación dos profesionais de sector na recuperación do noso patrimonio urbanístico, no embelecemento das poboacións e da posta en valor da nosa cultura paisaxística; así como a aposta pola sustentabilidade ambiental e a eficiencia, sen sacrificar a funcionalidade nin a estética.

Nesta mesma liña, incidiu na importancia da arquitectura como elemento dinamizador da economía, do turismo e da demografía, “un sector que ten moito que dicir na reconstrución económica que afrontamos”.

Sobre este punto, o titular da Xunta recordou que o Executivo autonómico leva anos desenvolvendo iniciativas en todas as frontes -vivenda, urbanismo e paisaxe-, activando medidas de país. “Plasmamos toda a nosa política para os vindeiros 5 anos no Pacto Social pola vivenda, asinado en xaneiro, e que mobilizará máis de 1.080 millóns para beneficiar a 70.000 familias, ademais de contribuír a xerar ou manter 30.000 empregos”, dixo, resaltando que no urbanismo e a paisaxe a Xunta sigue a dar continuidade a unha planificación iniciada nos últimos doce anos.

Así mesmo, resaltou a convocatoria este ano de axudas a particulares, comunidades e concellos e a posta en marcha de actuacións directas de rehabilitación por case 45 millóns de euros, entre eles: 4,5 millóns serán do Fondo de Cooperación que se concederán en forma de préstamos sen xuros a concellos de menos de 50.000 habitantes; 10 millóns formarán parte do Programa Rexurbe para rehabilitar zonas degradadas; e 7,6 millóns estarán destinados ás áreas de rehabilitación integral.

A estes recursos tamén hai que sumar: unha liña de axudas específicas para promotores; axudas urbanísticas que recibirán 39 concellos de menos de 20.000 habitantes para infraestruturas municipais; e 1 millón para loitar contra o feísmo, a través de pequenas intervencións para emendar máis de 300 impactos paisaxísticos.

Segundo o presidente do Executivo autonómico, todos estes obxectivos atopan o mellor reflexo nos proxectos galardoados: “Recoñecemos a visión innovadora de arquitectos como Juan Ignacio Prieto, Faustino Patiño e Estefanía Grandal, artífices da nova escola infantil de Veigadaña, en Mos; así como a aposta pola eficiencia do proxecto de reforma do antigo hotel Galicia, no centro de Vigo, de Leonardo Llamas”, expuxo, referíndose tamén ás iniciativas de recuperación levadas a cabo por Juan José Otero, Cecilia López, Juan Antonio Caridad e Isidro López.

Sobre Alfonso Penela aseverou que hai un Vigo contemporáneo que non se explica sen el, citando a recuperación do antigo Xeral, xa reconvertido en Cidade da Xustiza; e a rehabilitación premiada da vivenda da Praza dos Pescadores, “nese Vigo histórico que volve latexar”.

E de Manuel Gallego Jorreto, referente da arquitectura de Galicia, afirmou que soubo irmandar nas súas obras a innovación e respecto pola tradición e paisaxe, entendendo sempre que a obra do arquitecto debía ser amiga da integración, non da ruptura co establecido. “Comprometido coa funcionalidade e a beleza; comprometido coa terra, cos valores e co nosa cultura ata o extremo de poder dicir hoxe que as súas obras son xa patrimonio arquitectónico de Galicia”, abundou.

https://www.xunta.gal/notas-de-prensa/-/nova/57745/feijoo-eloxia-compromiso-arquitectura-galicia-coa-recuperacion-urbana-paisaxistica

A Xunta e as tres universidades galegas asinan o acordo para impartir na Comunidade os títulos interuniversitarios de Grao e Máster en Intelixencia Artificial

Subliña que, tras a sinatura, as universidades comezarán a elaborar as memorias de verificación das titulacións, co fin de comezar a impartir estas titulacións no curso académico 2022-2023

Salienta a ampla experiencia coa que conta o SUG na impartición de materias relacionadas coa área das TIC, cun destacado cadro docente e con centros de investigación especializados na materia

Valora a colaboración e a vontade de diálogo das tres universidades, reflectidas tamén no actual Plan de financiamento do Sistema Universitario Galego ou nos traballos sobre o novo Mapa de titulacións

O presidente do Goberno galego, Alberto Núñez Feijóo, destacou hoxe a colaboración entre a Xunta e as tres universidades galegas para acadar un acordo co fin de impartir na Comunidade os títulos interuniversitarios de Grao e Máster en Intelixencia artificial. Dúas titulacións, aseverou, cunha gran demanda e cunha enorme proxección de futuro, xa que se agarda que os seus titulados acaden practicamente o pleno emprego, ademais de ofrecer diversas saídas laborais en áreas como a análise de datos, a robótica ou o internet das cousas.

Durante a sinatura, Feijóo incidiu en que o proceso de implantación realizarase sobre dous piares básicos: a colaboración, xa que a planificación destas titulacións e todo o seu proceso de implantación se realizará de xeito consensuado e dialogado; e o equilibrio territorial, “porque serán os títulos máis accesible dos que se imparten en Galicia”, matizou.

Así mesmo, tanto o máster como o grao impartiranse nas tres universidades públicas galegas, onde actualmente se están a ofertar os graos de Enxeñaría informática: apostando, no caso do grao, por que os dous primeiros anos sexan comúns; e que nos dous últimos cada centro ou escola aposte por especializarse nunha das diferentes ramas desta disciplina.

“O obxectivo é poder ofertar 150 prazas de novo acceso no caso do grao -50 por cada universidade- e unhas 60 prazas de novo acceso no caso do máster -20 por centro-“, precisou, subliñando que tras a sinatura deste acordo, as universidades comezarán a elaborar as memorias de verificación das titulacións, co fin de comezar a impartilas no curso académico 2022-2023.

O presidente da Xunta asegurou que a posta en marcha destas dúas titulacións achegará un valor diferencial ao sistema universitario galego. E todo isto grazas á ampla experiencia coa que conta o SUG na impartición de materias relacionadas coa área das TIC, cun destacado cadro docente e con centros de investigación especializados na materia.

Logo de recordar que a aposta por esta disciplina encádrase na Estratexia Dixital de Galicia 2030, Feijóo concluíu valorando a colaboración e a vontade de diálogo das tres universidades, reflectidas tamén no actual Plan de financiamento do Sistema Universitario Galego ou nos traballos sobre o novo Mapa de titulacións.

https://www.xunta.gal/notas-de-prensa/-/nova/57717/xunta-tres-universidades-galegas-asinan-acordo-para-impartir-comunidade-titulos

No tocante á vacinación, salienta que o obxectivo da seguinte semana sería administrar 240.000 doses

O presidente do Goberno galego, Alberto Núñez Feijóo, avanzou hoxe, tras a reunión do Consello da Xunta, que o Sergas comezará a remitir aos case 100.000 galegos que superaron a covid-19 hai máis de tres meses un cuestionario sobre as súas secuelas para detectar casos de covid persistente.

Tras explicar que “son persoas que superaron a enfermidade, pero que seguen tendo algún síntoma ou algunha secuela como dificultade para respirar, perda de olfato, falta de forzas, febre, mareos, perda de peso, perda de cabelo, cambios na voz, trastornos de sono, situacións de ansiedade ou falta de ánimo”, o presidente da Xunta destacou que, unha vez que respondan esa enquisa, “os citaremos en Atención Primaria para coñecer exactamente a intensidade da secuela do covid persistente”.

“Avanzamos, polo tanto, na atención de todos os pacientes que pasaron a covid-19 para intentar mellorar a súa asistencia sanitaria, monitorizar o seu estado de saúde e coñecer mellor esa enfermidade e as súas consecuencias”, aseverou Feijóo.

Campaña de vacinación

No tocante á vacinación, o titular do Goberno galego salientou que “o obxectivo da seguinte semana sería administrar 240.000 doses”, facendo fincapé en que “os obxectivos soamente os podemos cumplir se o numero de vacinas que nos notifican finalmente chegan”

Nesa liña, Feijóo lamentou que esta semana estaba previsto administrar 180.000 doses, pero “non se cumpriron as previsións notificadas polo Ministerio de Sanidade en canto ás vacinas Janssen e nos vamos a quedar en 170.000.”

Agora mesmo estase a levar a cabo unha citación masiva con 15.000 persoas chamadas do grupo de 60 a 65 anos (con AstraZeneca); entre venres e domingo se administrarán 81.000 segundas doses de Pfizer e ao longo de toda a semana tamén se terán administrado outras 30.000 segundas doses de Moderna.

https://www.xunta.gal/notas-de-prensa/-/nova/57571/feijoo-avanza-que-sergas-remitira-aos-case-100-000-galegos-que-superaron-covid