Feijóo salienta que a iniciativa permitirá identificar potenciais empresas interesadas en asentar en Galicia os seus centros e obter información sobre o ecosistema de innovación para definir futuros apoios

Anuncia que a Manifestación de Interese xa activada para identificar iniciativas de empresas do sector primario, agroalimentario e outros que poidan optar aos fondos da UE ampliará ata o 14 de maio o prazo de recepción de solicitudes

O presidente do Goberno galego, Alberto Núñez Feijóo, informou hoxe da apertura ata o 31 de maio dunha manifestación de interese que impulsará a localización de novos centros de I+D+i en Galicia no marco da reconstrución económica post-pandemia.

Unha iniciativa, dixo, que estará encadrada dentro da cultura de colaboración público-privada e que permitirá identificar potenciais empresas interesadas en asentar aquí os seus centros e obter información sobre o ecosistema de innovación para definir futuros apoios.

Máis polo miúdo, Feijóo explicou que todas as propostas deberán cumprir con requisitos como: que o centro se sitúe en Galicia, que acolla a un mínimo de 30 traballadores, presentar un orzamento de 10 M€, unha actividade de polo menos 5 anos e estar orientados aos eixos da Estratexia RIS3.

Finalmente, Feijóo lembrou que esta non é a única Manifestación de Interese que se abriu na Comunidade, de feito, dixo, está en marcha unha activada para identificar iniciativas de empresas do sector primario, agroalimentario e doutros interesados neste eido que poidan optar aos fondos da UE, que amplía ata o 14 de maio o prazo para que os interesados manden as súas solicitudes.

https://www.xunta.gal/notas-de-prensa/-/nova/57573/xunta-abre-unha-manifestacion-interese-que-impulsara-implantacion-novos-centros

A iniciativa, para incentivar o consumo, arrincará a principios de maio con descontos de 30€ para os clientes, os establecementos interesados en participar xa poden presentar a súa solicitude

A iniciativa, para incentivar o consumo, arrincará a principios de maio con descontos de 30€ para os clientes, os establecementos interesados en participar xa poden presentar a súa solicitude

O delegado da Xunta na Coruña, Gonzalo Trenor, informou aos representantes do Centro Comercial Aberto de Carballo da iniciativa para incentivar o consumo que arrincará a principios de maio e que ofrecerá descontos de 30 euros aos clientes á hora de facer as compras no pequeno comercio.

Este programa forma parte do plan de apoio ao comercio galego no que tamén se inclúen o bono para mellorar as instalacións eléctricas de pemes e autónomos e as axudas para a substitución de electrodomésticos. Ademais, Trenor lembrou que esta entidade recibiu unha achega de 33.000 euros dentro das axudas dirixidas a asociacións de comerciantes, centros comerciais abertos (CCA) e federacións para a revitalización do comercio de proximidade.

No encontro, o representante do Goberno autonómico animou aos membros da entidade a solicitar a adhesión ao Bono Activa Comercio. O delegado da Xunta destacou que xa se poden adherir os establecementos interesados desde o pasado 15 de abril.

“Trátase dunha medida necesaria no contexto actual, onde os efectos da pandemia en sectores como o comercio teñen un enorme impacto e requiren da reacción inmediata das diferentes administracións, así como de medidas de acompañamento”, asegurou Trenor, quen engadiu: “Esta iniciativa de dinamización permitirá incrementar as vendas do comercio, á vez que os bonos de desconto outorgarán unha maior capacidade de compra aos consumidores”.

Este plan conta cun orzamento de 10 M€ que se repartirán en bonos de desconto de 30 euros dos que se poderán beneficiar ao redor de 330.000 clientes. Preténdese mobilizar 55 M€ para dinamizar as vendas nos establecementos de proximidade de toda Galicia e contribuír, deste xeito, á súa reactivación.

Este bono funcionará a través dunha aplicación móbil ofrecendo descontos de 5 euros por compras iguais ou superiores a 30, así como descontos de 10 euros se son iguais ou superiores a 50 cun período de validez de tres meses desde o seu lanzamento, previsto para principios de maio.

Esta iniciativa forma parte do Plan de medidas específicas de apoio ao comercio galego que contará con 20 M€ en axudas para incentivar o consumo e apoiar a modernización do sector a través da dixitalización e o comercio en liña. A Xunta conta con outras actuacións como o plan Renove Electrodomésticos, a través do que se investirán 3 M€ para que 20.000 fogares renoven os seus electrodomésticos e que os particulares xa poden solicitar; ou o Bono Enerxía Peme e Comercio, cuxo prazo de solicitude tamén está aberto, e que apoiará tanto a mellora como a renovación dos sistemas eléctricos, iluminación ou climatización para incrementar a eficiencia enerxética. Para esta última iniciativa, resérvanse 3 M€ cos que se espera chegar en Galicia a 1000 pemes e autónomos do comercio, a hostalería e as actividades artísticas, recreativas e de entretemento.

https://www.xunta.gal/notas-de-prensa/-/nova/57493/trenor-informa-plan-apoio-aos-establecementos-proximidade-anima-aos-comerciantes

O presidente da Xunta deulles a benvida a estes investigadores especializados en áreas como a física nuclear, as ciencias da terra ou a nanotecnoloxía e que ata o de agora estaban desenvolvendo o seu labor no Reino Unido, Países Baixos ou Suíza

O Goberno galego pon en marcha por primeira vez este ano o Programa de atracción e retención de talento investigador, dotado con 5M€, que supón a incorporación de 15 investigadores de recoñecido prestixio

O presidente da Xunta, Alberto Núñez Feijóo, recibiu os seis primeiros científicos que se incorporan aos centros de investigación universitaria de Galicia procedentes doutros países e doutras comunidades autónomas, e que están contratados ao abeiro do Programa de atracción e retención do talento da Consellería de Cultura, Educación e Universidade.

Acompañado do conselleiro Román Rodríguez, Feijóo deulles a benvida aos seis científicos que “desde xa se poñen a traballar ao servizo de Galicia e do conxunto da sociedade”. “Todos eles son investigadores cunha importante traxectoria profesional nos seus respectivos ámbitos, que agora van a desenvolver o seu labor desde os centros de investigación punteiros que temos na nosa Comunidade”, abondou o presidente da Xunta, que aproveitou para recoñecer a importancia do labor científico que “se puxo de manifesto, aínda máis se cabe, no actual momento de pandemia mundial”.

A Xunta lanzou por primeira vez o ano pasado o Programa de captación e retención do talento investigador, dotado con 5 millóns de euros, co obxectivo de incorporar 15 científicos distinguidos (10 na modalidade de atracción e cinco na de retención) aos seus oito centros de investigación punteiros. Ademais dos cinco de retención, nestes momentos están xa traballando nestes centros seis científicos (a razón de dous por universidade) da modalidade de atracción, mentres que os catro restantes desta modalidade que xa están seleccionados, dispoñen de catro meses para a súa incorporación.

Dous por cada universidade

Así pois, na Universidade da Coruña (UDC), incorporáronse ao Centro de Investigacións Científicas Avanzadas-Instituto de Investigación Biomédicas da Coruña (CICA-INIBIC) un investigador especialista en ciencias da terra e hidroloxía de solos en sistemas agrícolas e forestais procedente da Universidade Wageningen dos Países Baixos, e outro especialista en nanobiotecnoloxía do Centro de Investigación en Biomateriais de San Sebastián e especializado en nanotecnoloxía de carbono e grafenos.

A Universidade de Santiago de Compostela (USC) conta cun especialista en Física nuclear de altas enerxías pola Universidade de Pekín e procedente da Organización Europa para a investigación nuclear (CERN) que está incorporado ao IGFAE (Instituto Galego de Físicas de Altas Enerxías) e outro procedente do Instituto Catalán de Investigación Científica (ICIQ) que se incorpora ao CIQUS (Centro Singular de Investigación Química Biolóxica e Materiais Moleculares).

Pola súa banda, a Universidade de Vigo (UVigo) incorpora ao CINBIO (Centro de Investigación Biomédica) unha especialista química procedente da Universidade de Zurich, e outro científico procedente da Universidade de Bristol, especialista en economía circular, que se incorpora a ECOBAS (Economics adn Bussiness Administración for Society).

Apoio á carreira científica

Este Programa de retención e atracción do talento forma parte do conxunto de iniciativas da Xunta para o apoio á carreira científica en Galicia, desde o inicio da etapa de formación predoutoral, os contratos posdoutorais e agora esta nova acción para asentar investigadores distinguidos de recoñecida traxectoria profesional nas estruturas de investigación punteiras. De feito, Galicia é a única Comunidade que conta cun programa completo de formación investigadora.

A maiores, o Goberno galego mantén o apoio estrutural e estable dos principais axentes de investigación universitario, o que asegura o seu funcionamento ao longo dos anos coa consolidación de proxectos científicos a medio prazo. Neste ámbito enmárcase a liña de 20,5M€ para financiar o funcionamento dos oito centros de investigación universitaria en Galicia, que son os principais axentes científicos da nosa Comunidade; así como os 24M€ destinados aos 300 grupos de investigación (a escala científica seguinte á dos centros de investigación) funcionando nestes momentos nas universidades galegas.

https://www.xunta.gal/notas-de-prensa/-/nova/57470/feijoo-recibe-primeiros-seis-cientificos-programa-atraccion-talento-que-incorporan

Asevera que neste obxectivo atópanse outros potenciais aliados, como as entidades sociais ou o pequeno comercio; e incide na necesidade de formar unha gran alianza contra a soidade

Salienta que esta estratexia, pioneira en toda España, identifica cinco liñas estratéxicas: prevención, detección e intervención, visibilización e cooperación

Lembra que Galicia conta con 126.000 galegos de máis de 65 anos que viven sos

Subliña que moitos dos conceptos que guían esta iniciativa xa levan anos presentes nas políticas da Xunta, a través de iniciativas como Xuntos polo Nadal, o Xantar na casa, o Servizo de Axuda no Fogar ou a teleasistencia

O presidente da Xunta, Alberto Núñez Feijóo, avanzou hoxe a creación dunha mesa de traballo cos concellos para deseñar unha Estratexia galega de atención á soidade non desexada “de país e que arroupe a todos os maiores”; “unha mesa para analizar as medidas que están en marcha a nivel local, explorar vías de colaboración entre administracións e deseñar xuntos solucións novidosas”, precisou, co obxectivo de poder aprobala entre xuño e xullo deste ano.

Nesta liña, e ademais da Administración local, “que é a que mellor coñece aos veciños”, Feijóo aseverou que neste obxectivo atópanse outros potenciais aliados, entre os que destacou as entidades sociais ou o pequeno comercio, incidindo na necesidade de formar unha gran alianza contra a soidade.

Durante unha xornada de traballo sobre este asunto, Feijóo recordou que esta estratexia, pioneira en toda España, identifica cinco liñas estratéxicas: a prevención, xa que é fundamental actuar antes de que o fenómeno apareza, a través de iniciativas que favorezan as relacións sociais e a participación social ou cultural das persoas maiores. A detección e a intervención, respectando as preferencias e necesidades do maior para ofrecer o servizo que máis se axuste ás súas necesidades. E a visibilización e a cooperación, co fin de que a sociedade sexa consciente de que hai moitas persoas maiores que viven soas sen desexalo.

“O obxectivo é que todos os maiores se sintan arroupados e que pague a pena o esforzo de converternos en pioneiros para coidalos”, abundou, lembrando que, segundo o INE, Galicia conta con 126.000 galegos de máis de 65 anos que viven sos.

Así mesmo, subliñou que moitos dos conceptos que guían esta iniciativa xa levan anos presentes nas políticas do Goberno galego: co envellecemento activo, a través da aposta polo voluntariado sénior e programas como Xuntos polo Nadal; ou co envellecemento de proximidade, coa posta en marcha das casas do maior ou de servizos como o autobús de coidados porta a porta.

E en relación ao envellecemento atendido a domicilio, o titular da Xunta referiuse a medidas como o Xantar na casa, que leva menús a casa de máis de 1.600 galegos; o Servizo de Axuda no Fogar, no que Galicia é unha referencia, cun investimento de máis de 83 millóns de euros e 24.000 beneficiarios; ou a teleasistencia, que presta servizo a 7.600 galegos.

https://www.xunta.gal/notas-de-prensa/-/nova/57447/feijoo-avanza-unha-mesa-traballo-cos-concellos-para-desenar-unha-estratexia-galega

Emprego e Igualdade convoca un curso de formación en competencias brandas: aptitudes en organización, traballo en equipo, comunicación, creatividade, xestión emocional ou capacidade resolutiva, entre outras

Un estudo recente de Linkedin destaca que o 92% das persoas directivas de empresas consideran que as ‘soft skills’ son iguais ou máis importantes que as técnicas

O prazo de inscrición rematará o 10 de maio e a acción formativa terá lugar do 11 de maio ao 11 de xullo

A Xunta desenvolverá entre o 11 de maio e o 11 de xullo un obradoiro dixital de formación en competencias brandas, é dicir, o curso avaliará as habilidades dos participantes en organización, traballo en equipo, análise, conexión, comunicación, actualización, creatividade, xestión emocional e capacidade resolutiva.

A iniciativa está dirixida a persoas desempregadas maiores de 45 anos e parados de longa duración co obxectivo de mellorar as súas oportunidades laborais. Así, está enfocada á busca de emprego, ao autoemprego, á adaptación a situacións descoñecidas e aos novos contornos dixitais. Un estudo recente realizado por Linkedin destaca que o 92% das persoas directivas de empresas consideran que as competencias brandas son iguais ou máis importantes que as técnicas. Ademais, o 75% dos responsables de Recursos Humanos sinalan que as soft skills son esenciais ñá hora de seleccionar ou non un candidato. Si se fala de postos directivos, a porcentaxe aumenta ata o 94%.

As persoas interesadas en participar no obradoiro poden anotarse xa e ata o próximo 10 de maio a través da dirección de mail https://rumboaempregabilidade.fpgft.gal/. No curso analizaranse 9 competencias brandas e o grao de uso que se fai en cada unha delas, así como se exporán experiencias de persoas expertas no mundo do management, dos recursos humanos e da empresa. Así mesmo, haberá tamén sesións de coaching individuais.

https://www.xunta.gal/notas-de-prensa/-/nova/57411/xunta-organiza-obradoiro-dixital-para-mellorar-oportunidades-laborais-dos-maiores

Sinala que contará cunha dotación de 15 M€ e permitirá levar a cabo 230.000 actos asistenciais extraordinarios

O titular do Goberno galego, Alberto Núñez Feijóo, avanzou hoxe na rolda de prensa de Consello, a posta en marcha nas vindeiras semanas do Plan de recuperación da actividade asistencial.

Un plan, dixo, que permitirá reforzar o sistema sanitario galego para que, ademais de continuar coa actividade prevista, se recuperen os prazos de realización de probas previos á pandemia.

Sobre este punto, Feijóo destacou que contará cunha dotación de 15 M€ para levar a cabo 230.000 actos asistenciais extraordinarios: máis de 115.000 probas diagnósticas, máis de 92.000 consultas e máis de 19.000 procedementos cirúrxicos.

Finalmente, durante a súa intervención tamén explicou que para esta programación da actividade pendente se empregará o concepto de Hospital único, co obxectivo de optimizar todos os recursos dos que se dispón.

https://www.xunta.gal/notas-de-prensa/-/nova/57127/feijoo-avanza-aprobacion-nas-vindeiras-semanas-plan-recuperacion-actividade-asistencial

Dirixido a persoas traballadoras autónomas, microempresas, hostalaría e outros sectores pechados.

Liña 1

• Orde do 17 de febreiro de 2021 pola que se establecen as bases reguladoras do II Plan de rescate das persoas traballadoras autónomas e das microempresas afectadas pola crise da COVID-19, mediante o Programa I de persoas traballadoras autónomas (TR500A), susceptible de ser financiado parcialmente polo Fondo Social Europeo (FSE), e o Programa II de microempresas (TR500B), e se procede á súa convocatoria para o ano 2021
• Corrección de erros da Orde do 17 de febreiro de 2021
• Extracto – Programa I – persoas traballadoras autónomas (TR500A)
• Extracto – Programa II – microempresas (TR500B)

Liña 2

• Orde do 22 de febreiro de 2021 pola que se establecen as bases reguladoras do Programa I Hostalaría, de apoio ao sector da hostalaría (TR500C), e do Programa II Outras actividades pechadas (TR500D), e se procede á súa convocatoria para 2021
• Corrección de erros da Orde do 22 de febreiro de 2021
• Extracto – Programa I – hostalería (TR500C)
• Extracto – Programa II – outras actividades pechadas (TR500D)

https://empregoeigualdade.xunta.gal/axudas-subvencions/plan-de-rescate

Subliña que o toque de queda pasará das 22 ás 23 h, e manterase o peche perimetral da Comunidade

En relación ás residencias de maiores, salienta que se incrementan as visitas de xeito que os usuarios poderán ver aos seus achegados e familiares, sempre de un en un e con cita previa

Sobre á hostalería, precisa que se manterá como tope para a apertura dos bares as 21 horas, se ben os locais de restauración poderán servir ceas ata as 23 horas, sempre e cando se cumpran os requisitos que sairán no DOG

O presidente do Goberno galego, Alberto Núñez Feijóo, avanzou hoxe as novas medidas acordadas polo comité clínico de expertos sanitarios, entre as que destacou as relacionadas co toque de queda, as residencias de maiores e a hostalería.

Logo de precisar que todas as decisións acordadas entrarán en vigor a partir deste venres 16 de abril, Feijóo confirmou que Galicia seguirá apostando por unha apertura “progresiva, puntual e proporcional”, tendo a prudencia como máxima.

Así, subliñou que o toque de queda pasará das 22 ás 23 horas, ademais de trasladar a decisión de manter o peche perimetral da Comunidade ante o incremento da incidencia nalgunhas comunidades de España.

En segundo lugar, aseverou que a Administración autonómica continuará coa progresiva apertura das residencias de maiores. Deste xeito, se cada residente podía recibir tan só a visita de dúas persoas de referencia, a partir de agora poderá volver ver a os seus achegados e familiares, sempre de un en un, con cita previa e de acordo aos protocolos establecidos. Ademais, os residentes poderán saír ata tres veces por semana, cunha duración de catro horas por saída.

En relación á hostalería, o presidente da Xunta precisou que se manterá como tope para a apertura dos bares as 21 horas, se ben os locais de restauración poderán servir ceas ata as 23 horas, sempre e cando se cumpran os requisitos que sairán publicados no DOG, entre os que destacan: contar con licencia de restaurante, funcionar con cita previa e conservar un rexistro de clientes, e garantir a calidade do aire mediante o control do CO2 do local.

Por último, e diante do previsible fin do estado de alarma e da posibilidade de que o Goberno central recorra ante o Tribunal Constitucional a “lei de xestión da pandemia que aprobou o Parlamento galego”, Feijóo manifestou a incerteza que xera este escenario para seguir xestionando con rigor e con seguridade xurídica.

“Non é de recibo. Estamos moi sorprendidos con esta situación”, abundou, afirmando que o Goberno galego seguirá traballando en base a aperturas graduais e medidas e apostando pola vacinación.

https://www.xunta.gal/notas-de-prensa/-/nova/57093/feijoo-avanza-novas-medidas-acordadas-polo-comite-clinico-relacionadas-toque