A maiores, inclúense 395 prazas para a promoción interna do persoal funcionario e outras 3.419 prazas para continuar coa funcionarización do persoal laboral fixo

O Diario Oficial de Galicia (DOG) publica hoxe a Oferta de Emprego Público (OEP) da Administración Xeral da Xunta para o ano 2020, que esgota a taxa de reposición marcada polo Estado e inclúe un total de 2.585 prazas de acceso libre.

Tamén se ofertan 395 prazas para a promoción interna do persoal funcionario, uns procesos reservados a empregados públicos que xa son funcionarios e que poden acadar un ascenso ou promoción profesional a postos de traballo de maior responsabilidade e retribución. En total, a oferta na Administración Xeral ascende a 2.980 prazas.

A maiores, o decreto inclúe 3.419 prazas para a funcionarización do persoal laboral fixo, que dan continuidade ás máis de 1.400 prazas xa ofertadas nos dous últimos anos. Trátase dun proceso voluntario pactado no Acordo de concertación para a mellora das condicións do emprego público, asinado en 2019 cos sindicatos CC.OO. e UGT. e moi demandado polo persoal laboral fixo da Xunta. A diferenza da promoción interna, estas probas non teñen carácter competitivo, senón que permitirán modificar o réxime xurídico do traballador, que pasará de ser empregado laboral fixo a funcionario da Administración.

O aumento de prazas ofertadas ten a finalidade de garantir a posibilidade de que calquera persoa que cumpra os requisitos poida opositar para traballar na Xunta, garantir o dereito á promoción profesional dos empregados públicos que xa traballan na Administración galega, e continuar co proceso de funcionarización do persoal laboral fixo.

O maior número de prazas de acceso libre concéntrase no eido social, o que permitirá reforzar o persoal que traballa principalmente en centros de política social. O decreto inclúe na escala de axentes técnicos facultativos, 539 prazas para a especialidade de xardín da infancia; na escala de persoal de limpeza e recursos naturais e forestais, 476 prazas para a especialidade de persoal de limpeza e cociña; na escala de técnicos facultativos, 224 prazas para educadores; 173 prazas para a escala de persoal de servizos xerais (PSX); 151 para a escala de xerocultor/a e 25 prazas para a escala de auxiliar de coidadores.

A todas estas prazas poderá acceder calquera persoa que cumpra os requisitos esixidos nas correspondentes convocatorias, e as probas desenvolveranse a través do sistema de concurso-oposición, garantindo a aplicación dos principios de igualdade, mérito, capacidade e publicidade, e respectando a libre concorrencia.

https://www.xunta.gal/notas-de-prensa/-/nova/54323/dog-publica-hoxe-oferta-emprego-publico-administracion-xeral-para-2020-con-2

“Con cada paso seguimos camiñando cara un gran Ano Santo, e para iso planificamos un orzamento con partidas á altura da súa importancia”, di, referíndose a unha achega de máis de 85 millóns para o Xacobeo 2021

Afirma que neste 2021 os turistas e peregrinos que cheguen atoparanse unha Galicia segura, centrada na excelencia e na calidade turística

O presidente da Xunta, Alberto Núñez Feijóo, convocou hoxe aos galegos, aos visitantes e ao sector turístico para, entre todos, camiñar cara un Xacobeo no que a seguridade será un valor constante.

Durante o acto de presentación da campaña turística de Galicia 2021, Feijóo aseverou que está é só “un aperitivo do que nos vai tocar vivir”. “Con cada paso seguimos camiñando cara un gran Ano Santo, e para iso planificamos un orzamento con partidas á altura da súa importancia”, dixo, referíndose a unha achega de máis de 85 millóns de euros para garantir un Xacobeo: seguro, coñecido, recoñecido e dinámico.

“Non deixamos que a pandemia nos atrapase nas sombras, e decidimos avanzar”, asegurou, en alusión á peza composta por Xoél López, que pon a música ao spot da campaña; incidindo en que cando dicimos Camiña a Galicia estamos a referirnos a moito máis: a un destino para os turistas e peregrinos que veñen con ganas de resarcirse deste ano, sen dar as costas á obrigada seguridade; a unha dirección cara a que orientar os esforzos da reconstrución económica, e da reactivación do sector turístico; a un rumbo de referencia paisaxístico, cultural e verde; e a un escaparate, no que estarán postas as miradas do mundo.

Ao longo da súa intervención, Feijóo reiterou o compromiso do Executivo galego co sector, a través de medidas como o bono turístico, que xa solicitaron máis do 98% dos seus potenciais beneficiarios; os plans e protocolos elaborados para garantir establecementos seguros; e o Plan de albergues, para levar a cabo a mellora dos existentes e a posta en marcha doutros novos. “E comezamos a sentar as bases do Plan director 2021-2023 Galicia destino seguro”, confirmou, avanzando tamén a posta en marcha do Plan de reforzo do sector, dotado con 36 millóns de euros para o 2021.

Nesta mesma liña, lembrou a creación do seguro de coronavirus; “un plus de seguridade” que beneficiará aos turistas que visiten Galicia, cubrindo os gastos en caso de infección por covid.

“Nun momento de extraordinaria dificultade estamos chamados a actuar”, reiterou, subliñando que neste 2021 os turistas e peregrinos que cheguen á Comunidade e transiten pola “maior rúa de Europa”, atoparanse cunha catedral rehabilitada, despois dunha actuación de envergadura histórica; cun Pórtico da Gloria aberto e esplendoroso, tralos traballos de recuperación; cos Camiños mellor preparados de todos os Xacobeos; e cunha Galicia segura, centrada na excelencia e na calidade turística.

https://www.xunta.gal/notas-de-prensa/-/nova/54149/feijoo-convoca-aos-galegos-aos-visitantes-sector-turistico-para-entre-todos-caminar

Valoran a capacidade de superación do alumnado que cursa 4º de Secundaria fronte ás dificultades, ben sexan de tipo persoal, educativas ou de contorno familiar e sociocultural

A Consellería de Cultura, Educación e Universidade publica no Diario Oficial de Galicia a orde pola que se conceden os premios de educación secundaria obrigatoria ao esforzo e á superación persoal correspondentes ao curso 2019/20. Estes galardóns recoñecen a capacidade de superación de dificultades de 20 alumnas e alumnos que estudaron nese curso 4º de Secundaria, ben sexan de tipo persoal, educativas ou de contorno familiar e sociocultural.

A Xunta destina un total de 15.000 euros para estes premios a razón de 750 euros por cada un dos 20 galardóns que se conceden. A relación de centros con estudantes galardoados é a seguinte:

Cómpre subliñar que o obxectivo final destes galardóns é que os premiados sexan un exemplo para compañeiros e compañeiras en situacións similares, poñendo en valor o especial esforzo que supón acadar o éxito na escola.

https://www.xunta.gal/notas-de-prensa/-/nova/54090/xunta-concede-premios-eso-esforzo-superacion-persoal-eso-20-estudantes

“Arredor de 22.000 usuarios das residencias de maiores e de atención a grandes dependentes, uns 17.000 traballadores destes centros sociosanitarios e uns 3.000 traballadores sanitarios que están en primeira liña”, avanza o vicepresidente primeiro

Destaca que o operativo loxístico garantirá as condicións adecuadas de almacenamento, transporte, temperatura, trazabilidade e seguridade das vacinas

O vicepresidente primeiro e conselleiro de Presidencia, Xustiza e Turismo, Alfonso Rueda, destacou hoxe, na rolda de prensa do Consello, que Galicia contará cun equipo con máis de 200 profesionais de enfermería para coordinar a campaña de vacinación da covid. Se ben a Comunidade está á espera de coñecer con exactitude cando se poderá iniciar a campaña, Rueda afirmou que Galicia vai estar preparada para comezar coa vacinación de inmediato.

Contamos con recibir as primeiras doses despois da aprobación por parte da Axencia Europea do Medicamento, dixo, lembrando que a primeira das vacinas que chegarán será a de Pfizer/BioNTech, avaliada con ensaios clínicos realizados en seis países, nos que participaron arredor de 44.000 persoas, e que conta cunha eficacia estimada para previr a enfermidade dun 95%.

O obxectivo da Xunta, segundo explicou o vicepresidente primeiro, será o de vacinar nun primeiro estadio a máis de 40.000 cidadáns, ao ser necesarias dúas doses para que a vacina sexa efectiva. “Sen dúbida, son menos das que quixéramos e agardamos que inmediatamente nos sexan subministradas desde o Goberno máis doses para seguir coa vacinación de acordo co plan aprobado”, aseverou, precisando que a campaña comezará polos colectivos considerados prioritarios, como se reflicte no plan referendado onte polo subcomité clínico.

“Arredor de 22.000 usuarios das residencias de maiores e de atención a grandes dependentes; uns 17.000 traballadores destes centros sociosanitarios; e uns 3.000 traballadores sanitarios que están en primeira liña”, avanzou, confirmando que ao longo dos vindeiros días, a Consellería de Sanidade dará máis detalles sobre o plan.

Rueda asegurou que Galicia contará cun operativo loxístico para garantir as condicións adecuadas de almacenamento, transporte, temperatura, trazabilidade e seguridade das vacinas covid. Ademais de contar cunha serie de puntos de vacinación e cunha rede segura de transporte monitorizada, con seguimento constante de temperatura e localización.

No tocante ao equipo formado por eses 207 profesionais de enfermería dedicados exclusivamente á vacinación, subliñou que a adscrición a este equipo será voluntaria. E os profesionais procederán do persoal de enfermería con experiencia acreditada en vacinación que, ademais, recibirán unha formación específica para chegar a ser persoal experto na vacina covid.

Por último, cómpre salientar que baixo a coordinación deste equipo estarán: máis de 2.000 efectivos de enfermería de atención primaria, que vacinarán da covid aos pacientes das súas cotas; e preto de 40 efectivos máis dos servizos de enfermería preventiva e unidades de prevención de riscos laborais, que se encargarán da vacinación do persoal de centros hospitalarios.

En definitiva, concluíu, ter todo listo para, en canto se autorice a vacina e dispoñamos dela, comezar a vacinar “sen perder un minuto”.

https://www.xunta.gal/notas-de-prensa/-/nova/54056/galicia-contara-cun-equipo-con-mais-200-profesionais-enfermeria-para-coordinar

O director do Igape, Fernando Guldrís, e os directores xerais de Comercio e Consumo, Manuel Heredia, e Emprego, Traballo Autónomo e Economía Social, Covadonga Toca, participaron hoxe nun encontro dixital centrado nos últimos programas de axudas dirixidas a estes colectivos

Guldrís destaca que coas novas liñas de apoios para o acondicionamento de terrazas e de créditos brandos a Administración autonómica reforza as medidas para a recuperación da actividade do tecido empresarial galego

Toca sinala que a Xunta está a axilizar o máximo posible o pagamento das axudas do Plan de rescate no que se está a investir 84 millóns de euros

O director do Igape participou hoxe tamén na apertura da misión inversa dixital con EEUU na que empresas galegas do sector TIC exploran novas oportunidades de negocio con axentes públicos e privados norteamericanos

O director do Igape, Fernando Guldrís e o director xeral de Comercio e Consumo, Manuel Heredia, da Vicepresidencia segunda e Consellería de Economía, Empresa e Innovación e a directora xeral de Emprego, Traballo Autónomo e Economía Social, Covadonga Toca, da Consellería de Emprego e Igualdade, participaron esta tarde nun encontro dixital informativo sobre as últimas liñas de axudas activadas pola Xunta para favorecer a reactivación e dinamización da actividade de autónomos, microempresas e pemes.

Durante as súas intervencións no webinario, os directores destacaron que as dúas consellerías teñen como prioridade apoiar aos colectivos e sectores máis vulnerables ao impacto económico provocado pola pandemia da covid-19 con axudas que lles faciliten levar a cabo a súa actividade e dispor de liquidez para manter os seus negocios no actual contexto.

Nese sentido, o director do Igape lembrou que o novo programa de axudas dirixido aos establecementos hostaleiros e de restauración achegará 3 millóns de euros en apoios directos para permitir adecuar os espazos exteriores e adquirir elementos de envasado de comida e bebida para a entrega a domicilio ou a recollida no local. Poden solicitalas autónomos e pemes de menos de 50 traballadores e cubrirán o 80% do investimento, sendo a axuda mínima de 1200 euros e máxima de 20.000. Inclúen ademais a achega de anticipos no momento da resolución favorable pola metade da contía da axuda.

No que respecta á nova liña para a concesión de préstamos dotada con 10 millóns de euros, Guldrís fixo fincapé en que está destinada especialmente a achegar liquidez aos sectores con máis dificultades de acceso ao crédito, como a hostalería, o ocio nocturno, o comercio estacional, as feiras ou a economía social. Os préstamos contarán con xuros baixos e próximos ao 0% e poderanse amortizar en sete anos, con tres de carencia.

A directora xeral de Emprego, Traballo Autónomo e Economía Social, Covadonga Toca, pola súa banda, expuxo as liñas xerais do Plan de rescate no que a Xunta está a investir 84 millóns de euros para apoiar ás persoas traballadoras autónomas, microempresas e o sector da hostalería pechado como consecuencia das medidas ditadas pola autoridade sanitaria.

A iniciativa inclúe tres liñas de axudas diferentes: para autónomas e autónomos con e sen persoal a cargo (o prazo de solicitude remata o próximo venres 18 de decembro); para microempresas e autónomos con persoal contratado; e para os establecementos hostaleiros pechados desde a implantación das medidas sanitarias do pasado mes de outubro. Os dous últimos apoios poden pedirse ata o próximo 28 de decembro. Toca lembrou que o Goberno galego está a axilizar o máximo posible o pagamento destes apoios sinalando que xa se aboou o 30% das solicitudes recibidas na primeira liña de axudas (autónomos con e sen persoal a cargo).

Destacou, así mesmo, que todas as axudas son complementarias e acumulables entre si polo que, no caso dos autónomos con establecementos hostaleiros, as contías das axudas poderán chegar ata os 9.200 euros. A directora xeral incidiu, ademais, en que os negocios deste sector ubicados nos concellos máis afectados co nivel máis alto de restrición -coa posibilidade de abrir soamente as terrazas ao 50% ata as 17,00 horas- poden seguir optando as axudas previstas nas tres liñas do Plan.

Misión comercial do sector TIC en EEUU

O director do Igape participou tamén esta tarde na sesión de apertura da misión inversa dixital que durante tres días vai reunir empresas galegas e portuguesas do sector TIC con axentes públicos e privados norteamericanos. Organizado pola Xunta no marco do Proxecto ECICII PLUS para a Internacionalización das pemes da Eurorrexión Galicia-Norte de Portugal -cofinanciado polos programas europeos POCTEP e Feder-, o obxectivo deste foro é fortalecer a presenza das empresas galegas das telecomunicacións en Estados Unidos.

Desde hoxe ata o vindeiro venres, as empresas participantes asistirán a relatorios de expertos do sector e manterán encontros con empresarios, investidores e representantes de centros académicos, axencias públicas e aceleradoras do estado de Carolina do Norte, concretamente da chamada ‘rexión do triángulo de investigación’, no que traballan 60.000 persoas e 4000 empresas de tecnolóxicas e que destaca por conformar un ecosistema de innovación referente a nivel mundial e segundo en crecemento de EEUU.

Na súa intervención, Guldrís puxo de relevo a necesidade de seguir esforzándose na procura de novas oportunidades de negocio, investidores e novos socios comerciais no sector TIC estadounidense, especialmente no momento actual, no que o comercio internacional se viu alterado debido á expansión da covid-19. Salientou, ademais, que a misión quere contribuír a mellorar as boas relacións comerciais entre Galicia e EEUU, destino que segue a ser un dos primeiros das vendas galegas, ocupando a décima posición. O 15,4% das empresas exportadoras galegas venden os seus produtos neste mercado.

https://www.xunta.gal/notas-de-prensa/-/nova/54025/xunta-achega-informacion-autonomos-pemes-sobre-axudas-prestamos-destinados-aos

No programa, promovido pola Xunta e as fundacións Santa María la Real e de Telefónica, participan persoas sen emprego de entre 18 e 60 anos con diferentes niveis de estudos con ou sen experiencia laboral previa

En edicións anteriores esta iniciativa gratuíta acadou de media unha inserción laboral do 60% dos participantes

As lanzadeiras de emprego para axudar ás persoas sen traballo á súa inserción no mercado laboral comezaron nas localidades da Coruña, Carballo, Ourense, Pontevedra, Santiago de Compostela e Vigo. O programa de orientación laboral é gratuíto e nel están a participar un total de 174 persoas (116 mulleres e 58 homes) de entre 18 e 60 anos en situación de desemprego, con independencia do seu nivel de estudos e experiencia.

O obxectivo desta iniciativa, que impulsan as fundacións Santa María la Real e de Telefónica co apoio da Xunta, consiste en guiar a persoas en situación de desemprego para reactivar a súa procura de traballo mediante a formación en novas técnicas e ferramentas, co fin de que reforcen as súas competencias transversais e dixitais, para adaptalas ás demandas do mercado laboral. Así, as persoas participantes formaranse nas lanzadeiras ata finais de abril de 2021.

O programa está deseñado en formato mixto, co que as alumnas e alumnos asistirán a sesións virtuais e presenciais, con todas as medidas de seguridade, hixiene e distancia social. Durante a formación contarán co apoio e o asesoramento de técnicos especializados que lles aportarán competencias para realizar un itinerario integral de procura de emprego, actualización de currículo, simulación de entrevistas de traballo e contacto con empresas.

En edicións anteriores as lanzadeiras de emprego conseguiron un 60% de media de inserción laboral, obxectivo último da iniciativa encamiñada a mellorar a empregabilidade dos beneficiarios.

https://www.xunta.gal/notas-de-prensa/-/nova/53723/lanzadeiras-para-incrementar-oportunidades-laborais-das-persoas-desempregadas

Feijóo avanza que a Xunta está a traballar na marca CIGUS como selo identificativo dos centros de investigación galegos, que permita proxectar Galicia como referente no eido científico e investigador

O presidente da Xunta, Alberto Núñez Feijóo, destacou hoxe o fortalecemento do sistema científico incrementando ata os preto de 18 millóns de euros o investimento aos 8 centros de investigación acreditados das tres universidades galegas: o Ciqus, o Cimus, o Citius e o Igfae, da Universidade de Santiago de Compostela; o atlanTIC, o Cinbio e o Cim, da Universidade de Vigo; e o Citic, da Universidade da Coruña.

Durante o acto de entrega das acreditacións a centros de investigación do sistema universitario galego, Feijóo subliñou que os oito centros distinguidos terán garantido este financiamento para un período de tres anos, é dicir, ata 2022.

Ao longo da súa intervención, o titular do Goberno galego recordou que con estas acreditacións aspírase a consolidar un sistema científico máis competitivo, tanto a nivel estatal como europeo, co obxectivo de atraer e manter talento investigador e mellorar a posición das universidades galegas nos ránkings internacionais.

Feijóo aproveitou o acto para destacar os traballados que están a desenvolver estes centros, en eidos como a intelixencia artificial, o Big Data, as tecnoloxías de telecomunicación, a investigación nuclear, a I+D+i vencellada ao sector do mar, así como a investigación en áreas médicas como o xenoma do cancro, a loita contra a covid-19.

O responsable do Executivo autonómico avanzou tamén que a Administración galega está a traballar na marca CIGUS (Centros de Investigación do Sistema Universitario Galego) como selo identificativo dos centros de investigación galegos, que permita proxectar Galicia como referente no eido científico e investigador. Non en van, só tres comunidades contan cun selo para posicionar os seus centros: Cataluña (centros CERCA), País Vasco (centros GUNE) e Madrid (centros IMDEA).

Feijóo concluíu afirmando que a Xunta seguirá impulsando a investigación das universidades galegas e aos seus profesionais. Ao respecto, referiuse a modo de exemplo: ao programa de formación e retención de persoal investigador, dotado con 18 millóns de euros; ou ao programa de atracción e retención de talento, cun orzamento de 5 millóns, para incorporar 15 investigadores cunha traxectoria internacional.

Nesta mesma liña, recordou que Galicia é a terceira Comunidade Autónoma en maior porcentaxe de financiamento universitario en relación ao PIB. “E seguimos tamén impulsando proxectos como o Edificio Fontán, que estará rematado na primavera do vindeiro ano”, concluíu.

https://www.xunta.gal/notas-de-prensa/-/nova/53701/galicia-fortalece-sistema-cientifico-incrementando-ata-preto-18m-investimento