A directora de Augas de Galicia lembra as 750 actuacións levadas a cabo en materia de saneamento e abastecemento e a construción de 45 novas depuradoras que dan servizo a 1,7 millóns de galegos, o que supón máis da metade dos cidadáns

Destaca o investimento de 7 millóns de euros nos Plans de saneamento locais realizados xa nas rías do Burgo, de Arousa e de Pontevedra, e en execución nas rías de Noia, Cee-Corcubión e Ares-Betanzos

Subliña a colaboración cos concellos na extensión dos servizos de saneamento e depuración para chegar a máis de 3,3 millóns de galegos e a mellora na súa prestación, cumprindo o 90% das aglomeracións urbanas as directivas comunitarias

A directora de Augas de Galicia, Teresa Gutiérrez, destacou hoxe no Parlamento os máis de 1.100 millóns de euros mobilizados pola Xunta en actuacións de saneamento e abastecemento, así como o traballo que se está a realizar ante a Comisión Europea para seguir impulsando a mellora da calidade das augas.

Na súa comparecencia hoxe na Comisión 2ª do Parlamento de Galicia, a directora de Augas de Galicia repasou os principais fitos da Xunta no saneamento integral das rías galegas e a consecución dun bo estado medioambiental das súas rías e os seus ríos.

Lembrou que desde o ano 2009 o esforzo inversor realizado pola Xunta permitiu levar a cabo 350 actuacións de saneamento que beneficiaron a 165 concellos, así como máis de 300 actuacións en materia de abastecemento, das que se beneficiaron 186 concellos. Tamén se construíron 45 novas depuradoras, con capacidade para dar servizo a 1,7 millóns de cidadáns, o que supón máis da metade da poboación de Galicia.

Citou entre este investimentos e infraestruturas os case 100 millóns de euros destinados ao saneamento da ría do Burgo, os máis de 55 millóns na ría de Arousa, coa depuradora de Ribeira executada en colaboración co Estado; e os máis de 100 mobilizados, xunto co Estado, na ría de Ferrol. Tamén se referiu á depuradora de Lagares, en Vigo, cun investimento da Xunta de 80 millóns de euros.

Na súa intervención, a director de Augas de Galicia salientou o traballo de planificación na execución de infraestruturas de saneamento e depuración, a través dos Plans de saneamento locais, cun investimento duns 7 millóns de euros. Están xa realizados os Plans das rías do Burgo, Arousa e de Pontevedra e en execución os das rías de Noia, Cee-Corcubión e Ares-Betanzos.

Subliñou que co apoio técnico e financeiro da Xunta aos concellos nas súas competencias municipais, deuse un salto cualitativo en aspectos clave como, a extensión dos servizos de saneamento e depuración, que hoxe chegan a máis de 3,3 millóns de galegos e de galegas, fronte aos 1,8 millóns do ano 2009; ou a mellora da prestación deses servizos, cumprindo a día de hoxe o 90% das aglomeracións urbanas coas directivas europeas.

Actuacións estas, remarcou, que permitiron redundar na mellora da calidade das augas das rías galegas, mellorando en case 10 puntos porcentuais nos últimos anos, para acadar hoxe o 76% das masas de auga das rías un bo estado.

A directora de Augas de Galicia, tamén falou do traballo de planificación, medidas, infraestruturas e investimentos que terá continuidade ao longo de toda a lexislatura, máis aló das actuacións en execución, contratación ou en proxecto. Referiuse, concretamente, a algunhas actuacións que se están a impulsar, como poden ser as de Foz, Burela e Viveiro, pendentes de cuestións alleas a Augas de Galicia por requirir dos trámites de Costas do Estado, preceptivos para poder avanzar.

Finalmente, a responsable de Augas de Galicia expresou a vontade do Goberno galego de continuar traballando na xestión eficaz e eficiente da auga. Por iso, indicou, tamén se están a manter xuntanzas cos representantes da Comisión Europea para expoñerlles as prioridades de Galicia, en materia de augas, e que coñezan as necesidades estratéxicas da Comunidade de cara á posible obtención de financiamento comunitario futuro.

https://www.xunta.gal/notas-de-prensa/-/nova/51830/xunta-pon-valor-mais-1-100-millons-euros-mobilizados-para-saneamento-integral

Trátase de dous programas enmarcados na Estratexia galega para a Educación Dixital (Edudixital 2020) co que se busca estimular o espírito científico do alumnado e impulsar as vocacións STEM

A Consellería de Cultura, Educación e Universidade vén de convocar a participación dos centros escolares nos programas Club de Ciencia e Introdución á Robótica educativa en Primaria, dúas iniciativas enmarcadas dentro da Estratexia galega para a Educación Dixital (Edudixital 2020) da Xunta de Galicia.

O obxectivo destes dous programas é o de familiarizar os alumnos coas tecnoloxías, a robótica e a programación ao tempo que estimular o seu espírito científico e impulsar as vocacións STEM (Ciencias, Tecnoloxía, Enxeñaría e Matemáticas) cara a estudos posteriores nos campos de coñecemento do ámbito científico tecnolóxico.

Os centros dispoñen de prazo ata o 9 de outubro para solicitar a participación en ambas iniciativas.

Club de Ciencia

A Consellería xa ten aberto o prazo da convocatoria para a incorporación de novos centros docentes públicos ao programa de innovación educativa Club de Ciencia durante o presente curso 2020/2021. Os 119 centros que participaron no curso 2019/2020 verán tamén prorrogada a súa continuidade neste programa.

O Club de Ciencia funciona como un espazo de aprendizaxe non formal baseado nunha metodoloxía de indagación onde os docentes suxiren diferentes accións enfocadas ao alumnado co obxecto de que poidan dar resposta ás súas curiosidades, aos seus intereses e resolver problemas. Deberá estar formado por un ou máis docentes de calquera especialidade e alumnado de educación Primaria, Secundaria obrigatoria ou Bacharelato. Un dos docentes actuará como persoa coordinadora do club. As actividades desenvolverase fóra do horario lectivo do alumnado nos espazos que se consideren ou habiliten do centro docente.

Cada centro docente seleccionado para desenvolver un Club de Ciencia recibirá unha achega económica, a determinar en función do número de centros que finalmente participen no programa. O importe concedido a cada centro facilitará o desenvolvemento de cada proxecto durante o curso 2020/21 e poderase a destinar a fins relacionados coa mellora da realización das diferentes actividades dirixidas ao alumnado participante.

Este é o quinto ano consecutivo que se pon en marcha esta iniciativa, que naceu como experiencia piloto no curso 2016/17 con nove centros e que chegou aos 119 centros no pasado curso 2019/2020.

Introdución á robótica en Primaria

Tamén está aberto o prazo para que os centros públicos que o desexen soliciten a súa incorporación ao programa de innovación Introdución á robótica educativa en Primaria, co fin de que o alumnado poida iniciarse na experiencia de programación básica, robótica e construción. No caso dos centros docentes que participaron neste programa durante o pasado curso 2019/20, un total de 178 centros, a súa pertenza ao programa prorrogarase de xeito automático para o presente curso.

Como novidade este ano, cada centro docente seleccionado nesta convocatoria (tanto de continuidade como de nova incorporación) recibirá unha achega económica, a determinar en función do número de centros que participen finalmente no programa no curso 2020/2021. Con esta aportación económica preténdese facilitar o desenvolvemento de cada proxecto durante o curso 2020/21 e poderase a destinar a fins relacionados coa mellora da realización das diferentes actividades dirixidas ao alumnado participante.

O programa vai dirixido ao alumnado dos cursos 4º, 5º ou 6º de educación Primaria, polo que poderán presentar solicitudes os centros que impartan estes cursos. Os centros aos que vai destinado esta convocatoria, dentro da súa autonomía, pode integrar a robótica de diversas maneiras: mediante unha materia de libre configuración de centro no marco da normativa vixente, dentro das materias de forma transversal, a través de programas de innovación educativa desta Consellería ou obradoiros que se desenvolvan fóra do horario lectivo.

Cada centro docente de nova incorporación seleccionado para desenvolver o programa recibirá unha dotación de material relacionada coa robótica educativa para poder levar a cabo o proxecto, que estará formada por seis robots de uso educativo, adecuados ás idades do alumnado, seis kits de construción que permitan a realización dun mínimo de cinco proxectos diferentes, un manual de uso e unha guía didáctica.

En ambas as dúas convocatorias os centros deberán teren conta a previsión dos posibles escenarios que se puidesen dar en función da situación sanitaria (actividade lectiva presencial, semipresencial e/ou posibles períodos de confinamento) para a organización e desenvolvemento adaptado a cada escenario.

https://www.xunta.gal/notas-de-prensa/-/nova/51715/educacion-abre-prazo-para-participacion-dos-centros-nos-programas-club-ciencia

A directora da Axencia Galega de Innovación, Patricia Argerey, abriu esta mañá o terceiro encontro virtual do ciclo ‘A era poscovid: redeseñar o mundo’

No encontro, profesionais galegos deste ámbito destacaron a necesidade de construír marcas dotadas de significado capaces de dialogar cos consumidores de xeito honesto

A directora da Axencia Galega de Innovación (Gain), Patricia Argerey, destacou o valor do deseño como elemento facilitador de primeira orde para que as solucións innovadoras de resposta á crise aberta pola covid-19 despreguen toda a súa funcionalidade. Argerey interveu esta mañá na apertura institucional do terceiro encontro virtual do ciclo A era pos-COVID: redeseñar o mundo, dedicado ao deseño de marcas.

Neste novo evento do Programa de Deseño para a Innovación, a directora de Gain subliñou que son necesarios novos modelos de negocio e tamén unha concepción das marcas capaz de responder ás novas prioridades dos consumidores. Neste contexto, resaltou o compromiso da Xunta co impulso da innovación responsable, aquela que impacta directamente na vida das persoas desde a transparencia e o compromiso coa sustentabilidade. Segundo expuxo, o deseño de marcas fortes e relevantes é un factor decisivo para crear a cultura que subxace nesa innovación responsable.

Por outro lado, Argerey destacou que a pandemia acelerou un proceso que xa se viña impoñendo como un factor decisivo de competitividade: a dixitalización dos procesos de negocio de calquera sector empresarial, desde o pequeno comercio ata a gran industria, un eixe no que a Xunta está a intensificar os seus apoios.

Marcas con máis significado

No encontro participaron cinco profesionais galegos que compartiron a súa visión sobre o deseño de marcas con representantes de empresas e centros tecnolóxicos. Os relatores foron Iván Mato, director creativo de Jones Knowles Ritchie en Londres; Dani Bembibre e David Silvosa, socios do estudio de deseño e construción de marcas Costa; e Charo Froján e Alfredo Olmedo, creativos da marca de moda D-due.

Iván Mato destacou que a pandemia provocou que as marcas tivesen que actuar e isto fixo que quedasen retratadas polos seus valores diante dos consumidores, poñendo como exemplo unha empresa cervexeira que destinou parte da súa capacidade de produción para poñer no mercado xel hidroalcólico nun momento no que había desabastecemento. Ademais, subliñou que as marcas que estaban dixitalizadas reaccionaron antes e mellor fronte á crise, ata o punto de ser un factor clave de supervivencia.

Pola súa banda, David Silvosa e Dani Bembibre puxeron en valor o deseño como ferramenta para achegarlle unha forma ás marcas para que trascendan no tempo e que poidan resistir a momentos complicados coma este. Ademais, destacaron que as marcas con éxito son as que buscan a súa esencia. Sobre as experiencias dixitais, tan estendidas a raíz da pandemia, insistiron no gran desafío que supón deseñalas de xeito que non supoñan só trasladar ao formato virtual o que se facía en formato presencial, buscando a humanización desas experiencias con elementos coma a interactividade.

Os creadores da marca de moda D-due, Charo Froján e Alfredo Olmedo, afirmaron que este é o momento de Galicia e que eles se deron conta a raíz da súa experiencia no mercado xaponés, que lles permitiu reafirmar o valor do que se fai aquí: a artesanía, a calidade e a autenticidade. Ademais, explicaron que na súa traxectoria foi fundamental o proceso de construír unha narrativa propia que lles permite difundir unha mensaxe única e honesta a través da súa marca.

Próximas citas co deseño

A directora de Gain anunciou que o ciclo A era pos-COVID. Redeseñar o mundo rematará a principios de novembro cun último encontro centrado no deseño de novos espazos como tema principal.

Así mesmo, informou da apertura de inscricións ao ciclo Materiais para o futuro, ligado á Materioteca de Galicia. O primeiro dos tres workshops online deste ciclo terá lugar o 8 de outubro coa presentación de novos materiais para impresión 3D. Durante a xornada presentarase tamén a nova base de datos da Materioteca de Galicia, na que se poderán consultar en detalle as características e aplicacións desta mostra de materiais innovadores con selo galego.

https://www.xunta.gal/notas-de-prensa/-/nova/51686/xunta-destaca-deseno-como-ferramenta-para-contribuir-innovacion-responsable-que

“Estamos a falar dun plan para afrontar coas máximas garantías o curso e estar preparados para calquera situación que obrigue a suspender a educación presencial”, subliña

A iniciativa está estruturada en catro grandes eixes de actuación, con medidas dirixidas ao alumnado, ao profesorado, aos centros e ás familias

O presidente da Xunta, Alberto Núñez Feijóo, avanzou hoxe, na rolda de prensa do Consello, o reforzo da actividade educativa cun plan de educación non presencial e semipresencial, que permitirá aos alumnos contar, ao longo do curso, con 55.000 dispositivos dixitais.

“Estamos a falar dun plan para afrontar coas máximas garantías a educación non presencial e semipresencial e estar preparados para calquera situación que obrigue a suspender a educación presencial, como: supostos de corentenas no caso de contactos estreitos ou supostos de illamentos no caso de positivos”, salientou, incidindo en que a semipresencialidade está prevista só para alumnos de Bacharelato e FP; mentres que os supostos de non presencialidade se producirán no caso de corentena ou illamento, e se estenderían así tamén para o resto do sistema educativo.

Durante a súa intervención, Feijóo subliñou que o plan está estruturado en catro grandes eixes de actuación, con medidas dirixidas ao alumnado, ao profesorado, aos centros e ás familias.

No caso do alumnado, reiterou que a primeira acción pasará pola dotación de dispositivos dixitais, co obxectivo de contar cun total de 55.000 dispositivos electrónicos: 20.000 para prestar ao alumnado con máis necesidades económicas, mentres que os restantes corresponden aos participantes no programa de libro dixital E-Dixgal.

Para acadar este fin, investiranse 5,3 millóns de euros en equipamento dentro da iniciativa E-Dixgal, cos que se adquirirán os 10.000 novos equipos necesarios para a ampliación do programa este curso: 8.000 para alumnado e 2.000 para profesorado. Deste xeito, un total de 34.000 alumnos disporán de ordenadores dentro do E-Dixgal.

Ademais, subliñou que o Consello deu luz verde á sinatura dun convenio de 8,5 millóns de euros para cofinanciar co Goberno central a adquisición de 17.000 portátiles, aos que se sumarán outros máis de 3.000 portátiles que achegará a Xunta: 1.000 de maneira inmediata e outros 2.000 que estarán listos ao longo deste primeiro trimestre.

Por outra banda, e no apartado dos contidos, resaltou que o plan inclúe orientacións sobre o estudo e aprendizaxe semipresencial e non presencial, con estratexias de organización. E estenderanse ademais os contidos dixitais para os cursos de 3º e 4º da ESO.

En relación ao eixe dirixido ao profesorado, este centrarase sobre todo na formación, coa elaboración dun plan de formación sobre as aulas virtuais nos centros, así como a posta a disposición da comunidade educativa dun Banco de recursos educativos, para facilitar a semipresencialidade. Ademais de intensificarse o uso da plataforma do libro dixital -que pasou dunha media de 1 millón de accesos a 2,3 millóns- e o servizo de videoconferencia.

No que atinxe aos centros, Feijóo explicou que se publicarán orientacións sobre semipresencialidade para alumnado e familias; “e haberá formación para todos os membros da comunidade educativa, desde a perspectiva educativa e sanitaria”, engadiu.

Finalmente, no referido ás familias, o presidente do Executivo autonómico asegurou que a clave será a información, co espazo virtual Volvamos á escola con sentidiño e o reforzo da app AbalarMóbil, que actualmente conta con 290.000 usuarios rexistrados e á que durante o confinamento accederon unha media de 60.000 usuarios diarios.

“Nunca fixemos un inicio dun curso escolar durante unha pandemia e estamos someténdonos a unha proba de estrés docente e sanitario sen precedentes. Estou convencido de que isto non é fácil e haberá dificultades, atascos e problemas puntuais que, espero, poidamos ir resolvendo nos próximos días e semanas”, concluíu Feijóo.

https://www.xunta.gal/notas-de-prensa/-/nova/51692/xunta-reforza-actividade-educativa-cun-plan-educacion-non-presencial-semipresencial