Feijóo avanza que esta aplicación podería implementarse no mes de setembro despois de ser testada en agosto, nun grupo pechado de persoas, e presentada ao Goberno central

Sinala que sería completamente voluntaria e mantería a privacidade dos usuarios, que poderán ser tanto residentes en Galicia como viaxeiros

Esta aplicación permitirá identificar o nivel de risco transmisor do usuario fronte á covid-19

A persoa que descargue a app poderá optar por identificarse, empregando a Chave 365, ou escoller un perfil anónimo

O presidente do Goberno galego en funcións, Alberto Núñez Feijóo, avanzou hoxe que Galicia iniciará no mes de agosto unha experiencia piloto nun grupo pechado de persoas a través da nova aplicación para o móbil ‘PassCOVID’. En base aos datos do Servizo Galego de Saúde, esta aplicación permitirá identificar o nivel de risco transmisor da persoa usuaria fronte á covid-19 e facilitar a xeración de alertas aos contactos indicados por esta no caso de dar positivo nunha proba PCR.

Logo de testar este novo sistema en agosto, Feijóo sinalou que en setembro se valorará a posibilidade de implementalo para que tanto os residentes en Galicia como os viaxeiros poidan descargala nos seus dispositivos móbiles. No caso de que se chegue a implementar, precisou que PassCOVID será sometida a consideración do Consello interterritorial de Saúde.

O presidente da Xunta en funcións fixo fincapé en que este sistema será completamente voluntario. Así, a persoa que descargue a aplicación poderá optar por identificarse empregando o sistema de identificación seguro Chave 365, o que lle permitirá acceder a todas as funcionalidades de PassCOVID; ou escoller un perfil anónimo, en cuxo caso a aplicación lle proporcionará información xeral e consellos sobre a situación da pandemia.

Deste xeito, a información será personalizada, no caso dos perfís identificados; e local, no caso dos usuarios que activen voluntariamente a xeolocalización. Isto último permitiralles recibir alertas sanitarias da zona de Galicia na que se atopen.

PassCOVID tamén servirá de canle de comunicación entre o sistema público de saúde e os cidadáns con información sobre novidades e evolución da pandemia; zonas de risco; datos; indicadores xerais e por concello; recursos e servizos dispoñibles; e recomendacións e información sobre protocolos de protección e seguridade aplicables en cada momento e lugar.

O titular da Xunta en funcións avanzou que esta nova aplicación podería, ademais, contar con novas funcionalidades en seguintes versións, como a coordinación coa aplicación estatal RadarCOVID. Esta última identifica contactos detectados automaticamente pola app, mediante a aplicación de tecnoloxías de proximidade.

Tamén, no caso dos establecementos de restauración, estase a traballar para que o cidadán poida rexistrar na aplicación PassCOVID o establecemento no que estivo a través dun código QR. Así, no caso de que a Administración identificase algún positivo ou contaxio no local, activaría unha alarma aos usuarios da aplicación.

A previsión é publicar a orde na que se determinará o marco regulatorio do sistema PassCOVID na próxima semana.

https://www.xunta.gal/notas-de-prensa/-/nova/50669/galicia-iniciara-unha-experiencia-piloto-mes-agosto-traves-aplicacion-mobil-passcovid

O director do Igape, Juan Cividanes, e a directora xeral de Comercio e Consumo, Sol Vázquez, participaron hoxe nun encontro dixital con pemes e autónomos organizado pola Cámara de Comercio de Santiago de Compostela

Destacaron que estes apoios ofrecen achegas de ata 3000 euros para implantar nos negocios medidas de protección fronte o covid-19, que poden ser novas ou xa realizadas desde a declaración do estado de alarma

Como publicará mañá o DOG, as axudas poderán solicitarse ata o 17 de agosto e poden destinarse á adquisición de equipos de protección, á adaptación de espazos, á realización de obras e á posta á disposición de información para os clientes

A Xunta ampliará o prazo de presentación de solicitudes das axudas do programa Reactiva comercio e servizos seguros. O Diario Oficial de Galicia (DOG) publicará mañá esta medida, tal e como informaron hoxe o director do Igape, Juan Cividanes, e a directora xeral de Comercio e Consumo, Sol Vázquez, a autónomos e pemes nun encontro dixital organizado pola Cámara de Comercio de Santiago de Compostela.

Os directores xerais destacaron o apoio da Xunta ao esforzo que están a facer os autónomos e as pemes galegas para impulsar a reactivación económica e a protección da saúde de clientes e traballadores e subliñaron que estes apoios ofrecen achegas ata 3000 euros para implantar nos negocios medidas de protección fronte o covid-19.

Cividanes, dunha banda, explicou que a Xunta activou estas liñas de axudas para facilitar a volta á actividade dos sectores do comercio, o turismo, os servizos e o transporte en condicións de confianza para os consumidores. Autónomos, pemes e entidades de economía social poden optar aos apoios para cubrir os gastos das medidas que se implanten agora como as xa realizadas desde a declaración do estado de alarma, mediante unha tramitación rápida e sinxela, que inclúe a achega de anticipos no momento da resolución favorable da axuda pola metade da contía dos investimentos realizados.

A directora xeral de Comercio e Consumo lembrou que os Reactiva comercio e servizos seguros dispoñen dunha dotación de 16 millóns de euros e neles colaboran as consellerías de Economía, Emprego e Industria; Cultura e Turismo (no marco do plan Galicia destino seguro); e Infraestruturas e Mobilidade. As axudas cobren os gastos realizados para a adquisición de equipos de protección individual e de desinfección; a adaptación dos espazos con equipamento de seguridade e redución do contacto entre persoas; a realización das obras de renovación, limpeza e ventilación do aire; e a posta á disposición dos clientes de información relativa ás medidas hixiénicas e de protección.

Así, os establecementos comerciais, empresas do sector turístico e salóns de peiteado de menos de 10 traballadores poden obter apoios polo 100% das medidas activadas, desde 300 a 1200 euros. Por outro lado, as pemes de menos de 50 traballadores tanto destes sectores como do transporte, os servizos e as actividades profesionais poden beneficiarse de apoios directos do 80% do custo nas medidas de seguridade precisas, desde un mínimo de investimento de 1500 euros ata un máximo de 3750, sendo polo tanto a axuda máxima de 3000 euros.

Durante a xornada, Cividanes remarcou outras medidas incluídas no Plan de reactivación económica dirixidas a pemes e autónomos, como as que reforzan a aposta pola dixitalización e a innovación tecnolóxica, ás que se destinan 16 millóns de euros para facilitar a reactivación do tecido empresarial e a súa adaptación á actual situación derivada da covid-19.

Tamén ao abeiro do Plan, o Goberno galego vén de activar unha liña de microcréditos que facilitará préstamos de entre 3000 e 20.000 euros a cada negocio, con xuros bonificados ao 100% pola Xunta e cun prazo de duración máxima de cinco anos, cun ano de carencia como tope. A iniciativa, dotada con 6,1 millóns de euros de orzamento, e coa previsión de mobilizar ata 50M€ entre microempresas (menos de 10 traballadores), desenvolverase en colaboración coas sociedades de garantía recíproca (SGRs) e as entidades financeiras.

https://www.xunta.gal/notas-de-prensa/-/nova/50641/xunta-amplia-prazo-presentacion-solicitudes-para-axudas-programa-reactiva-comercio

O conselleiro de Cultura e Turismo en funcións, Román Rodríguez, visitou esta mañá o espazo informativo itinerante instalado na Alameda de Santiago de Compostela

Desde hoxe e durante o mes de agosto, esta iniciativa percorrerá diferentes puntos de Galicia informando sobre as medidas postas en marcha contra a covid-19

Enmárcase no programa Galicia destino seguro, coa que o Goberno autonómico está a acompañar ao sector na súa adaptación ao actual contexto sanitario

No marco do programa Galicia destino seguro, a Xunta de Galicia vén de pór en marcha unha campaña itinerante de concienciación que percorrerá a Comunidade durante o verán. Nela infórmase aos viaxeiros e aos propios galegos das medidas postas en marcha para garantir un turismo seguro no actual contexto sanitario, así como dos recursos turísticos dispoñibles na nosa Comunidade.

O conselleiro de Cultura e Turismo en funcións, Román Rodríguez, visitou esta mañá a primeira das accións da campaña, en Santiago de Compostela, onde se situou unha unidade móbil que funciona a modo de oficina de turismo na Alameda compostelana desde onde se achega información á cidadanía e aos turistas cunha mensaxe de responsabilidade, precaución e respecto no actual contexto sanitario.

O espazo informativo está atendido por profesionais da información turística e tamén difunde o destino, poñendo en valor recursos como o Camiño de Santiago, a paisaxe, a natureza, a enogastronomía ou o patrimonio cultural.

A Mariña, Rías Baixas e Ribeira Sacra

Está previsto que a campaña percorra Galicia e que estea presente nas sete cidades galegas e municipios turísticos con maior densidade de poboación, que superen os 10.000 habitantes. Así, tras Santiago de Compostela, onde estará todo o día de hoxe, continuará en Ferrol e iniciará o mes de agosto na A Coruña.

Continuará o resto da campaña en localidades que incluirán destinos como A Mariña lucense, a Ribeira Sacra, así como varios destinos costeiros. En concreto está previsto que en agosto visite Ribeira, Rianxo, Betanzos, Lugo, Monforte, Sarria, Viveiro, Ourense, O Carballiño, Poio, Pontevedra, Sanxenxo, O Grove, Cambados, Vilagarcía de Arousa, Cangas do Morrazo, Vigo, Nigrán, Baiona e Tui.

A campaña itinerante dá continuidade á batería de medidas postas en marcha pola Xunta para garantir seguridade e protección aos viaxeiros, traballadores e galegos no actual escenario. Enmárcase no Plan de Reactivación do sector turístico aprobado o pasado mes de abril que inclúe accións para promover Galicia como un destino seguro, con accións que axuden a xerar liquidez no tecido empresarial e o incentivar o consumo.

https://www.xunta.gal/notas-de-prensa/-/nova/50643/xunta-impulsa-unha-campana-concienciacion-que-percorrera-galicia-veran-para-promover

Sinala que a primeira quenda dos campamentos se desenvolveu con plena normalidade e coa máxima seguridade

Salienta a posta en marcha de novas actividades como os campamentos de cociña e outros con temática aeronáutica, tecnolóxica ou de coidado do medio ambiente

O presidente do Goberno galego en funcións, Alberto Núñez Feijóo, destacou hoxe a importancia dos campamentos de verán da Xunta para conciliar e que a rapazada se coñeza entre si e coñeza Galicia. “Estamos a falar dunha razón para que as familias poidan conciliar, dunha razón para que as rapazas e rapaces poidan coñecerse entre si e dunha razón para coñecer Galicia”, subliñou.

Durante unha visita ao campamento de verán do albergue xuvenil Marina Española en Bergondo, no que se aloxaron nesta primeira quenda 35 nenas e nenos, Feijóo resaltou o labor fundamental que cumpren estes centros na planificación de todas as familias.

Por outra banda, o titular da Xunta en funcións sinalou que a primeira quenda dos campamentos se desenvolveu con plena normalidade e coa máxima seguridade. Un obxectivo acadado, dixo, grazas a que a Administración autonómica, en colaboración cos profesionais sanitarios e cos do tempo libre, deseñou un protocolo específico para campamentos e albergues xuvenís.

Deste xeito, reducíronse os aforos nun 50%; extremouse a limpeza e a hixiene; as chegadas dos nenos estanse a facer de xeito escalonado; todas as familias están a enviar unha declaración responsable de saúde; compuxéronse subgrupos de participantes cun máximo de 15 persoas; e impartiuse formación previa para todo o equipo de profesionais dos campamentos. Ademais de incrementarse a proporción de monitores, multiplicándose por cinco.

Así mesmo, e para compensar a redución do número de prazas, Feijóo destacou a posta en marcha de novas actividades como os campamentos de cociña e outros con temática aeronáutica, tecnolóxica ou de coidado do medio ambiente; novas instalacións, como as residencias xuvenís de Lugo e Ourense ou as residencias de tempo libre de Patos (Nigrán) ou O Carballiño; e minicampamentos de cinco días, unha iniciativa pioneira que se desenvolve en establecementos turísticos e que está a ter un grande acollida, con máis do 90% das prazas cubertas.

Despois desta primeira quenda, nos vindeiros días chegarán aos albergues e campamentos xuvenís galegos novas rapazas e rapaces.

https://www.xunta.gal/notas-de-prensa/-/nova/50606/feijoo-destaca-importancia-dos-campamentos-veran-para-conciliar-que-rapazada

Fináncianse obras de mellora e tamén a compra de equipamentos

A Xunta de Galicia vén de resolver a concesión de axudas para obras de mellora e adquisición de equipamento en centros de menores xestionados por entidades de iniciativa social. O Diario Oficial de Galicia (DOG) de hoxe publica a listaxe de centros e entidades beneficiados destas achegas económicas, que ascenden a un montante global de 625.000 euros.

En total, outorgáronse 21 axudas para actuacións de adecuación en centros e outras 23 para a compra de equipamentos. Estas achegas están cofinanciadas polo Fondo Europeo de Desenvolvemento Rexional no marco do programa operativo Feder Galicia 2014-2020 e contribúen a mellorar os servizos de acollemento residencial ou de atención de día a nenas, nenos e adolescentes que prestan entidades sociais, e que forman parte do sistema de protección de menores da Administración autonómica.

As axudas para obras de mellora oscilan entre os 32.600 euros, as de maior contía, e os 12.000 euros as de menor. As dirixidas á compra de equipamento sitúanse entre os 6.000 e os 10.000 euros.

O Diario Oficial de Galicia (DOG) vén de publicar a convocatoria deste programa que ten como obxectivo acadar a integración laboral das persoas con máis dificultades para atopar un posto de traballo

O Goberno galego financia a creación, ampliación, mantemento e adaptación dos postos de traballo nos centros especiais de emprego

Nesta convocatoria, como novidade, introdúcense medidas excepcionais para a concesión das axudas e a tramitación dos pagamentos anticipados no caso de Ertes derivados da covid-19

A Xunta vén de abrir o prazo de solicitude para as axudas coas que se apoiará o emprego de 3200 traballadores con discapacidade dos centros especiais de Galicia. Deste xeito, a Administración autonómica mantén o seu compromiso coa economía social para que Galicia poda seguir desenvolvendo un modelo centrado nas persoas, integrador e que proporciona emprego de calidade.

O Diario Oficial de Galicia (DOG) vén de publicar a convocatoria do programa ao que a Consellería de Economía, Emprego e Industria destina 17,2M€ para apoiar aos 110 centros especiais de emprego na Comunidade. A iniciativa permite apoiar a creación, ampliación, continuidade e adaptación dos postos de traballo, así como o mantemento do custo salarial dos seus traballadores e a contratación de unidades de apoio.

O obxectivo principal destas axudas é promover a integración laboral deste colectivo. De feito, a nova convocatoria inclúe tres programas: cun millón de euros financiarase os custos salariais e de Seguridade Social derivados da contratación indefinida de 82 profesionais para unidades de apoio en 30 centros de traballo, que se prevé que atendan a 535 persoas con discapacidade con especiais dificultades de inserción laboral. Neste caso, a contía das axudas será como máximo de 2400 euros anuais por cada traballador con discapacidade atendido pola unidade de apoio.

O segundo plan, cun millón de euros de investimento, está dirixido á creación, ampliación, mantemento e adaptación de postos de traballo nos centros especiais de emprego de iniciativa social. A Xunta estima axudar a 13 entidades na xeración de 40 postos de traballo indefinidos. A contía da axuda será de 12.000 euros por posto creado a xornada completa, que se pode incrementar con incentivos acumulables do 25% en colectivos como mulleres, persoas con discapacidade ou en risco de exclusión social, maiores de 45 anos, emigrantes retornados ou centros de traballo emprazados no rural. Deste xeito, os apoios poderán alcanzar os 30.000 euros.

Este programa tamén inclúe apoios para a adaptación de postos de traballo e a eliminación de barreiras arquitectónicas con axudas de 2000 euros por posto adaptado. Así mesmo, concederanse axudas para financiar asistencias técnicas que sexan necesarias para a creación, mantemento e mellora dos centros especiais de emprego. Entre outros, financiarase a contratación de persoal de dirección, os traballos necesarios para a obtención de certificados de calidade, estudos de viabilidade, organización e comercialización, asesoramento, auditorías e informes económicos. As contías oscilarán entre os 2000 e os 15.000 euros.

A terceira das iniciativas está dirixida ao mantemento do custo salarial de 3200 traballadores dos 110 centros especiais. A axuda para este ano será de 6650 euros por traballador contratado a xornada completa, incrementándose ata os 7980 euros anuais para aqueles con especiais dificultades de inserción laboral.

Ertes

Esta convocatoria introduce como novidade medidas excepcionais para a concesión das axudas e a tramitación dos pagamentos anticipados no caso de expedientes de regulación de emprego temporal (Ertes) derivados da pandemia da covid-19. Así, en todos os programas, o feito de que a persoa pola que se solicita a axuda estea afectada por un Erte non impide a concesión do apoio.

Nas axudas para financiar ás unidades de apoio, o tempo de suspensión dos contratos ou redución de xornada das persoas atendidas terase en conta como tempo traballado; e no programa para a creación, ampliación, mantemento e adaptación de postos, o tempo de suspensión dos contratos non se computará para determinar o período máximo subvencionable.

A medida enmárcase na nova Axenda de Emprego, que promove a integración laboral e calidade no traballo das persoas con discapacidade ou en risco de exclusión social.

https://www.xunta.gal/notas-de-prensa/-/nova/50530/xunta-abre-prazo-para-solicitar-axudas-apoio-emprego-3-200-traballadores-con

E unha iniciativa de difusión, sensibilización e formación impartido pola escola de negocios da Fundacion Abanca IESIDE para que as pemes galegas e o seu persoal directivo coñezan as tecnoloxías disruptivas que marcarán a vindeira década

Comezará en outubro e o prazo de inscrición estará aberto do 1 de agosto ao 1 de outubro

Na xornada de presentación de AceleraTech estarán Gonzalo Garre, de IESIDE, e Pablo López, experto en blockchain

A Axencia para a Modernización Tecnolóxica de Galicia (Amtega) presenta o vindeiro 30 de xullo o programa formativo “AceleraTech, impulsando a transición dixital”, que se comezará en outubro. AceleraTech dirixido tanto ás pemes galegas como ao seu persoal directivo para que as tecnoloxías disruptivas máis relevantes e os beneficios e condicionantes necesarios para integralas na súa estratexia, estrutura e modelo de negocio.

O programa, que se desenvolverá a partir de outubro en colaboración coa IESIDE, abrangue diferentes xornadas formativas e prácticas específicas para persoal directivo e xerentes de empresas galegas.

A presentación de AceleraTech terá lugar o vindeiro 30 de xullo por streaming e nel realizarase unha exposición do programa así como unha aproximación a unha das tecnoloxías que se van abordar neste, o blockchain.

Para asistir á xornada de presentación de AceleraTech é preciso inscribirse a través da páxina web do CDTIC, https://cdtic.xunta.gal/es/aceleratech-blockchain, no correo electrónico cdtic@xunta.gal ou no teléfono 881 995 200.

Programa específico para persoal directivo

A iniciativa está dirixida principalmente a persoal directivo, xerentes e propietarias/os de empresas, xa que estas son as persoas con capacidade de decisión e as que poden impulsar e liderar unha transformación tecnolóxica real destas.

O programa desenvolverase a partir de outubro e estenderase ao longo de cinco sesións formativas e un taller final. As temáticas das sesións versarán sobre os seguintes aspectos: A competencia na era dos negocios dixitais; Big data, data science e intelixencia artificial; Internet of the things e 5Gg; Blockchain; Ciberseguridade; Construíndo a transformación dixital da peme: taller Lego® Serious Play®.

As prazas para participar neste programa formativo son limitadas e o prazo de preinscrición estará aberto desde o 1 de agosto ata as 18:00h do 1 de outubro.

https://www.xunta.gal/notas-de-prensa/-/nova/50543/amtega-presenta-30-xullo-programa-formativo-aceleratech-para-facilitar-inmersion